2017-2021 yillarda O'zbekiston Respublikasini rivojlantirishning beshta ustuvor yo'nalishi bo'yicha harakatlar strategiyasi
Yillar davomida to‘plangan muammolar birdaniga hal bo‘lmaydi

Farg‘ona viloyati Qo‘shtepa tumanida o‘tkazilgan sayyor qabulda fuqarolarning qonuniy manfaatlarini himoya qilish, ularni qiynayotgan muammolarni hal etish va adolatni qaror toptirishga alohida e’tibor qaratildi.

Bugungi kunda hududlarda o‘tkazilayotgan sayyor qabullar xalq ichiga kirib borish, uning dardini tinglash, tashvish va muammolariga bamaslahat yechim izlashning eng samarali vositasi sifatida katta ahamiyat kasb etmoqda. Albatta, yillar davomida to‘planib qolgan muammolarning hammasini bir paytning o‘zida, birdaniga hal etib bo‘lmaydi. Bu imkonsiz. Lekin harakat qilinib, muammolar yechimiga choralar izlanmoqda. 

 

Viloyat prokurori Ulug‘bek Qosimov qabul jarayonida 43 nafar fuqaroning murojaatini tingladi. 40 ta yozma murojaatlar qabul qilinib, ularning aksariyatiga shu yerning o‘zida yechim topildi. Murojaatlar asosan, sog‘liqni saqlash, ishga joylashish, uy-joy, moddiy yordam, yo‘llarni ta’mirlash, ichimlik suvi ta’minoti, tadbirkorlikni qo‘llab-quvvatlash hamda kommunal masalalarga oid bo‘ldi. 

 

Qabul chog‘ida 5 nafar fuqaro ishga joylashtirildi, 5 kishi tibbiy ko‘rikdan o‘tkazilib, davolanishga yotqizildi, 3 nafari fuqaroga nogironlik aravachasi berildi.

 

– Qizim oliy o‘quv yurtiga to‘lov kontrakt asosida o‘qishga qabul qilinganligi sababli kontrakt-shartnoma to‘lovini to‘lashda qiynalib qoldik, – deydi F. Jalilova. – Viloyat prokurorining sayyor qabulida ta’lim krediti olish masalasida murojaatim qildim. Viloyat markaziy banki vakillari bu masalada amaliy yordam beradigan bo‘ldi.

 

–Tumandagi Xumdon qishlog‘ida nogiron va kam ta’minlangan oilalar uchun 18 ta xonadondan iborat ko‘p qavatli uy qurilgan, – deydi M. G‘anieva. – Mazkur xonadonlar foydalanishga topshirilgan bo‘lsada hozirgi kunga qadar kadastr hujjati rasmiylashtirilmaganligi sababli egalik huquqlarini belgilash cho‘zilmoqda. Sayyor qabul davomida mazkur masala tuman hokimi hamda viloyat, tuman kadastr bo‘limi vakillari ishtirokida ko‘rilib, hal etiladigan bo‘ldi.

 

Sayyor qabulda yechimi ma’lum vaqt talab etiladigan murojaatlar bo‘yicha tegishli tashkilotlarga ko‘rsatmalar berilib, ijrosi nazoratga olindi. Shuningdek, viloyat prokurori 10 nafar kam ta’minlangan oilalarning xonadonida bo‘lib, ular bilan muloqotda bo‘ldi.

 

M. Sulaymonov, O‘zA

04.10.2019

Foydali resurslar