Forish tumanidagi 2-sektor hududidagi «Garasha» mahallasida viloyat prokurori Islom Ergashxodjaev ishtirokida sayyor qabul o‘tkazildi.

Qabul boshlanishida so‘zga chiqqan O‘zbekiston Respublikasi Prezidentining viloyat xalq qabulxonasi mudiri Bayrambek Uzoqov, viloyat prokurori Islom Ergashxodjaev qabuldan ko‘zlangan maqsad aholini qiynab kelayotgan dolzarb muammolarga echim topish ekanligini ta’kidlashdi.

Islom Ergashxodjaev har bir murojaatchi bilan yuzma-yuz muloqotda bo‘ldi. Qabulga kelgan 87 nafar fuqarolardan 21 ta murojaatlar kelib tushdi. Ushbu murojaatlar viloyat prokuraturasi tomonidan o‘rganilmoqda.

Sayyor qabul davomida viloyat sog‘liqni saqlash, xalq ta’limi, viloyat tijorat banklari boshqarmalariga, viloyat elektr tarmoqlari korxonasi va boshqa tashkilotlarga murojaatning ijrosi yuzasidan muddatlar belgilab berildi va alohida nazoratga olindi.

Bundan tashqari sayyor qabul davomida fermer xo‘jaliklari, kichik biznes sub’ektlari, korxona, tashkilot, muassasalardagi bo‘sh ish o‘rinlari bo‘yicha «Bo‘sh ish o‘rinlari» mehnat yarmarkasi ham tashkil etildi. Unda tumanda faoliyat yuritayotgan 14 ta korxona, tashkilot, muassasalar, kichik biznes sub’ektlari hamda fermer xo‘jaliklari o‘zlarida mavjud bo‘lgan 30 ta bo‘sh ish o‘rinlari hamda tuman hokimining 2018 yil 26 noyabrdagi 2176-sonli qaroriga asosan ijtimoiy himoyaga muhtoj va ish qidirishda qiynalayotgan shaxslar uchun 5 ta ajratilgan KVOTA ish o‘rinlari bilan qatnashdilar. Mehnat yarmarkasida ish bilan band bo‘lmagan 45 nafar fuqarolar qatnashdi. Shular «Garasha» mahalla fuqarolar yig‘iniga 12 nafar, «Ilonli» mahalla fuqarolar yig‘iniga 15 nafar fuqarolar haq to‘lanadigan jamoat ishiga jalb etildi. 5 nafariga o‘zlari tanlagan kasb mutaxassisliklari bo‘yicha korxona va tashkilotlarga yo‘llanma asosida ishga yuborildi. 13 nafar fuqaroga «Aholini ish bilan ta’minlash to‘g‘risida»gi qarorga asosan hamda oilaviy tadbirkorlikni rivojlantirish bo‘yicha yo‘l-yo‘riq va maslahatlar berildi.