Fuqarolarning hayotiy muammo va ehtiyojlarini hal etish, aholi bilan ochiq, to‘g‘ridan-to‘g‘ri muloqotni kuchaytirish-bugunning dolzarb vazifalaridan biri hisoblanadi.

Qolaversa, bu jarayon har bir rahbarga alohida mas’uliyat yuklab, xalq dardi bilan yashash, ularning muammolariga echim izlashiga undaydi.

Oqdaryo tumanidagi pedagogika kolleji binosida o‘tkazilgan navbatdagi sayyor qabulda mazkur hudud hamda unga yondosh tumanlar aholisining turli sohalarga oid 250 ga yaqin muammolari, talab va takliflari eshitildi. Xususan, qabul chog‘ida fuqarolarning qonuniy manfaatlarini himoyalash, ularni qiynayotgan muammolarni bartaraf etish, adolatni qaror toptirishga alohida e’tibor qaratilib, har bir murojaat birma-bir muhokama qilindi.

Aksariyat murojaatlarda keltirilgan muammolar o‘z joyida hal etilib, murojaatchining talabi qondirildi. Ma’lum muddat, ya’ni atroflicha o‘rganish taqozo etiladigan murojaatlar bo‘yicha tegishli mutasaddilarga topshiriqlar hamda murojaat egalariga huquqiy tushunchalar berildi.

Shuningdek, tadbir davomida Davlat xizmatlari agentligi viloyat boshqarmasi tomonidan fuqarolarga sayyor tartibda mobil davlat xizmatlari ko‘rsatilib, 11 nafar fuqaroning o‘zboshimchalik bilan qurilgan turar joy binosiga egalik huquqi tasdiqlanib, tuman hokimining qarorlari va 4 nafar murojaatchining farzandlariga tug‘ilganlik to‘g‘risidagi guvohnomalar taqdim qilindi. 6 nafar fuqaroning ko‘chmas mulk ob’ektlariga bo‘lgan huquqlarini davlat ro‘yxatidan o‘tkazilganligi to‘g‘risidagi kadastr guvohnomasi topshirildi. Shu bilan bir qatorda qabul chog‘ida hududda mehnat yarmarkasi tashkil etildi. Oqdaryoliklarga tumandagi 44ta korxonada mavjud 135 ta bo‘sh ish o‘rinlari taklif etildi.