“Obod qishloq” dasturi muvaffaqiyatli amalga oshirilayotgan Mirzacho‘l tumanida 10 ta yangi “ISUZI” rusumli avtobusning qatnovi yo‘lga qo‘yilib, yo‘lovchilarga katta qulaylik yaratdi.

“Mirzacho‘l Servis avto” mas’uliyati cheklangan jamiyati tomonidan xarid qilingan avtobuslar shu paytgacha mitti avtobuslar va engil taksilar qatnayotgan “Gagarin – Toshkent” yo‘nalishida yo‘lovchilarga arzon xizmat ko‘rsatishi bilan qo‘shimcha qulaylik bo‘ldi. Shuningdek, “Gagarin – Jizzax” yo‘nalishida qatnovchi avtobuslar sonining ko‘payishi tufayli qatnovlar oralig‘i ancha qisqarib, yo‘lovchilar manzilga tezroq etmoqda.

“Gagarin – Paxtazor”, “Gagarin – Gulzor” kabi ichki yo‘nalishlarida avtobus qatnovlari yo‘lga qo‘yilishi qishloqlar aholisi, ayniqsa, Paxtazor qishloq xo‘jaligi kasb-hunar kolleji o‘quvchilari uchun katta qulaylik yaratdi. Hozirgacha bu yo‘nalishlarda avtobus qatnamasligi tufayli yo‘lovchilar faqat engil taksi xizmatidan foydalanishga majbur bo‘layotgan edi. 

– Yangi avtobuslarni tijorat bankining 2 milliard 750 ming so‘m kredit mablag‘idan foydalanib xarid qildik, – deydi “Mirzacho‘l Servis avto” mas’uliyati cheklangan jamiyati” rahbari Qahramon Abdurahmonov. – Har bir avtobusda ikki nafar kishi ishlayapti. Yangi avtobuslar keltirilishi bilan 20 ta ish o‘rni yaratildi. Eng muhimi transport xizmatidan foydalanishda yo‘lovchilarning tanlash imkoniyati, sohada raqobat paydo bo‘ldi. 

Bundan avvalroq Jizzax shahrini Farg‘ona vodiysi bilan bog‘lovchi hamda G‘allaorol, Zomin, Forish tumanlarida qishloqlaro yangi avtobus yo‘nalishlari ochilgan edi. 

Toshqul BEKNAZAROV, O‘zA