Samarqand viloyati hokimi Erkinjon Turdimov Paxtachi tumanidagi Shamsi Nazarov nomli mahallada sayyor qabul o‘tkazdi.

Qabul davomida aholi tomonidan maktabgacha ta’lim muassasalari tashkil etish, yo‘llarni ta’mirlash, toza ichimlik suv ta’minotini yaxshilash, kommunal sohadagi kamchiliklarni bartaraf etish, uy-joy bilan ta’minlash, kredit olish va boshqa masalalarda 160 dan ziyod murojaat tushdi.

Masalan, Kattaqo‘rg‘on shahar Jizmonsoy mahallasida yashovchi Qurbonqul Norqulov shahardagi ichki yo‘llar nosoz holga kelganligi, ta’mirlanayotganlari esa sifatsiz bajarilayotganligi yuzasidan murojaat qildi. Viloyat hokimi bu masala bo‘yicha shahar hokimligi hamda yo‘l qurilishi korxonalari rahbarlariga topshiriqlar berdi.

Urgut tumani Katta Torinjak mahallasida yashovchi Ra’no Sultonovaning xususiy maktabgacha ta’lim muassasasi ochish uchun yer maydoni ajratish masalasidagi murojaatiga shu yerning o‘zida ijobiy yechim topildi.

– Muammolarni hal etishga barchamiz birdek mas’ulmiz, – dedi E.Turdimov. – Bugun hal etmasak, yechimini kutayotgan masalalar kundan-kunga ortib boradi. Shuning uchun har bir rahbar va mutasaddilar aholi tomonidan tushgan murojaatlarga mas’uliyat bilan yondashishi lozim. Shundagina davlat idoralari xalqqa xizmat qilishi kerak, degan g‘oya amalda o‘z isbotini topadi.

Sayyor qabuldan so‘ng murojaatlarni hal etishga mas’ul etib belgilangan mutasaddilar aholi bilan yuzma-yuz muloqot o‘tkazdi.