Sirdaryo viloyati Xovos tumanida 13 ta 2 qavatli va 3 ta 1 qavatdan iborat 2 sotixli uy-joylar nogironligi bor, kam ta’minlangan xotin-qizlarga topshirildi.

Shu munosabat bilan tashkil etilgan tantanali tadbirda viloyat hokimi G‘.Mirzaev, Bosh vazir o‘rinbosari, Xotin-qizlar qo‘mitasi raisi T.Norboeva va boshqalar Davlatimiz rahbarining joriy yil 19 fevral kuni viloyatga tashrifi chog‘ida xotin-qizlarini uy-joy va ish bilan ta’minlash bo‘yicha bergan topshirig‘i ijrosi yuzasidan viloyatda tizimli ishlar amalga oshirilayotgani ta’kidlandi.

– Bankdan 15 yilga imtiyozli kredit olib, uy-joyli bo‘ldik, – deydi 1-guruh nogironi Nargiza Sodiqova. – Uyning boshlang‘ich badali davlatimiz tomonidan to‘lab berildi. Yangi loyihalar asosida qurilgan 3 xonadan iborat 2 sotixli uyda o‘g‘limga kelin tushirib, hovli to‘yi bilan qo‘shaloq qilib nishonladik.

13 ta 2 qavatli uyning 6 tasi uch xonali, 7 tasi ikki xonali. 3 ta 2 sotixli uy-joy esa 3 xonali bo‘lib, mazkur uy egalarining 10 nafariga respublika xotin-qizlar jamoat fondi mablag‘i hisobidan hamda 6 nafar kasanachilik asosida faoliyat yuritayotgan xotin-qizlarga respublika “Mahalla” xayriya jamoat fondi mablag‘i hisobidan uy-joyning boshlang‘ich badallari to‘lab berildi.

Shuningdek, yangi uy sohibalariga homiy tashkilotlar tomonidan turli uy-ro‘zg‘or buyumlari, mebel va jihozlar sovg‘a qilindi.

A.QAYuMOV, F.TOShMATOV (surat), O‘zA