Oliy sud raisining o‘rinbosari X.Yodgorov Andijon viloyatining bir qator hududlarida bo‘lib, ajrashish yoqasiga kelib qolgan oilalar bilan uchrashdi.

Oliy sud Matbuot xizmatining ma’lum qilishicha, dastlab, Andijon shahridagi Muhammad Yusuf nomidagi davlat ixtisoslashtirilgan umumta’lim maktabida tashkil etilgan uchrashuvda notinch oilalar, ajrim yoqasiga kelib qolgan er-xotinlar bilan suhbatlashdi, ularni yarashtirish choralari ko‘rildi.

Natijada o‘nga yaqin oila ajrashish fikridan qaytib, yarashtirildi.

Andijon shahar Xalq qabulxonasida tashkil etilgan sayyor qabulda Oliy sud raisi o‘rinbosari va Oliy sud sudyalari fuqarolarni qabul qilib, ularning murojaatlari tinglandi.

Shu kuni X.Yodgorov xalq deputatlari Paxtaobod tumani kengashining navbatdan tashqari sessiyasida so‘zga chiqib, tumanda oilaviy ajrimlarning mavjudligi, viloyatda nikohni bekor qilish bilan bog‘liq ishlarning sudlarda ko‘rilishi, oilaviy ajrimlarga sabab bo‘layotgan omillar haqida fikr bildirdi.

Bu masalalarda sud idoralari, tuman hokimligi xotin-qizlar qo‘mitasi, mahalla, yarashtiruv komissiyalar faoliyatidagi kamchiliklar tahlil qilindi.

X.Yodgorov Bo‘z tumani hokimligida tashkil etilgan tadbirda oilaviy ajrimlar bilan bog‘liq muhokamalarda o‘z munosabatini bildirdi. Oilalar mustahkamligini ta’minlashda jamoat tashkilotlarining o‘rni va oldinda turgan vazifalar xususida takliflarini bildirib o‘tdi.

Oliy sud raisi o‘rinbosari X.Yodgorovning joylarda aholi bilan uchrashuvlari davom etmoqda. 

O‘zA