Qarshi shahrida yashovchi Feruza Samayeva ayni paytda 36 yoshda, yolg‘iz ona, shu birga poytaxtda pedagogika yo‘nalishida 3-bosqichda sirtqi bo‘limda ta’lim olmoqda.

Ammo ro‘zg‘or tashvishi, farzandining tarbiyasi uchun doimiy daromad manbai kerak. Qo‘ldan berganga qush to‘ymaydi deganlaridek, yaqinlarining yordamiga ham hamisha tayanib qololmaydi. Ishlash kerak. Shu maqsadda o‘ziga munosib ish qidira boshladi.

Qarshi shahridagi Kasbiy ko‘nikmalar markazida Qashqadaryo viloyati kambag‘allikni qisqartirish va bandlik boshqarmasi boshlig‘i Faxriddin Muhammadiyev ishtirokida ishsiz fuqarolarning bandligini ta’minlash masalalariga qartilgan sayyor qabul Feruza kabi ishsiz fuqarolar uchun ayni muddao bo‘ldi.  

Rahbarga murojaatini aytar ekan uning mushkuli oson bitdi. Tegishli tashkilotlar bilan hamkorlikdagi harakatlar tufayli shu kunning o‘zida Qarshi shahridagi nodavlat ta’lim tashkilotlaridan biriga tarbiyachi sifatida joylashtirildi.

- Muammoyim qisqa fursatlarda hal etilganidan ko‘nglim tog‘dek ko‘tarildi, - deydi Feruza Samayeva. — Endi xarajatlarimni o‘zim bemalol qoplay olaman. Farzandimga ham g‘amxo‘rlik qilaman. O‘qishimni ham davom ettiraman.  

Ta’kidlash lozimki, sayyor qabulda fuqarolarning muammo va takliflari joyida eshitildi. Sayyor qabul jarayonida aholi bandligini ta’minlash, doimiy daromad manbalarini yaratish, kasb-hunarga o‘qitish hamda tadbirkorlik faoliyatini yo‘lga qo‘yish masalalariga alohida e’tibor qaratildi.

Mazkur sayyor qabullar murojaatlar ko‘p qayd etilgan, shuningdek, takroriy arizalar kelib tushayotgan mahallalarda o‘tkazib kelinmoqda.

Bu galgi tadbirda 72 nafar fuqaro ishtirok etdi. Shundan 51 nafarining murojaati joyida hal etildi. Qolgan murojaatlar esa asosan subsidiya ajratish, ijtimoiy nafaqa tayinlash, bandlik dasturlari orqali ish bilan ta’minlash va kredit olishga ko‘maklashish kabi masalalarga taalluqli bo‘lib, tegishli mutasaddi idoralarga ijro uchun yuborildi.

- Fuqarolarning muammolarini joyiga borib eshitish, ularni ish bilan ta’minlash va ijtimoiy qo‘llab-quvvatlash faoliyatimizning eng ustuvor yo‘nalishlaridan biridir, — deydi boshqarma boshlig‘i F.Muhammadiyev.  

Sayyor qabul yakunida har bir murojaat bo‘yicha aniq chora-tadbirlar belgilandi va ijrosini ta’minlash yuzasidan mas’ullar zimmasiga tegishli vazifalar yuklatildi.