Oʻzbekiston Respublikasi Prezidentining Qoraqalpogʻiston Respublikasi shahar-tumanlaridagi Xalq qabulxonalariga 16 ta “Cobalt” rusumli xizmat avtomashinasi tantanali topshirildi.

Prezidentimizning Qoraqalpogʻiston Respublikasidagi Xalq qabulxonasi rahbari H.Halimov va boshqalar Xalq qabulxonalari faoliyatini yanada takomillashtirishga qaratilayotgan alohida yuksak samaralar berayotganini taʼkidladi.

Davlatimiz rahbarining 2019 yil 17 yanvardagi “Aholi muammolari bilan ishlash tizimini yanada takomillashtirish chora-tadbirlari toʻgʻrisida”gi farmoni aholi murojaatlari bilan ishlash tizimini yangi bosqichga koʻtarish, odamlarni qiynab kelayotgan muammolarni oʻz vaqtida aniqlash va unga yechim topishda kuzatilgan kamchiliklarni bartaraf etishga xizmat qilmoqda. Ushbu hujjat bilan Xalq qabulxonalarining muammolarni uyma-uy yurish orqali aniqlashi va hal qilishi, davlat organlarining xalq bilan bevosita ishlashini nazarda tutadigan yangi tizim joriy qilinmoqda.

Shahar va tuman Xalq qabulxonalarining xizmat avtomashinalari bilan taʼminlanishi ularning xalq orasiga kirib borishi, muammolarning tezda yechim topishiga xizmat qiladi. Xususan, Qoraqalpogʻiston Respublikasidek yer maydoni keng hudud uchun bu gʻoyat muhimdir.

– Bu kabi eʼtibor va gʻamxoʻrlik bizga yanada ulkan masʼuliyat yuklaydi, – deydi Oʻzbekiston Respublikasi Prezidentining Qoraqalpogʻiston Respublikasi Qoraoʻzak tumanidagi Xalq qabulxonasi rahbari B.Mamutov. – Aholi, xususan, nogironligi boʻlgan shaxslar, kam taʼminlangan va ijtimoiy himoyaga muhtoj qatlamning muammolariga qisqa muddatda yechim topishda muhim ahamiyatga ega.

Tadbirda Qoraqalpogʻiston Respublikasi Joʻqorgʻi Kengesi Raisi M.Yerniyazov soʻzga chiqdi.

Yesimxon Qanoatov, Maqsad Habibullayev (surat), OʻzA