Mamlakatimizda fuqarolarning huquq va erkinliklarini ishonchli himoya qilish, odamlarni qiynayotgan turli muammolarni hal etish, odil sudlovga erishish, aholining huquqiy madaniyatini yuksaltirishga qaratilgan keng koʻlamli ishlar amalga oshirilmoqda.

Jinoyat ishlari boʻyicha Andijon viloyati Buloqboshi tuman sudiga oʻtgan yili qilingan murojaatlarning aksariyati qanoatlantirildi yoki murojaat boʻyicha koʻtarilgan masalalar ijobiy yechimini topdi.

– Oʻtgan yili tuman sudiga Prezidentning Xalq qabulxonalari orqali, shuningdek, virtual tarzda va bevosita 80 dan ortiq yozma, ogʻzaki murojaatlar boʻldi, – deydi Jinoyat ishlari boʻyicha Buloqboshi tuman sudi raisi Inomjon Normatov. – Murojaatlar orasida sayyor sud va qabullar doirasida kelib tushganlari ham koʻp. Murojaat qiluvchilarning 46 foizi muqaddam sudlangan va maʼmuriy javobgarlikka tortilgan shaxslardir.

Murojaatlarning asosiy qismi berilgan jazoni yengillashtirish, fuqarolar huquq va manfaatlarining buzilishi, ishga joylashish, sud hukmidan nusxa olish masalalariga tegishlidir.

– Bir necha oy avval sud qarori bilan menga katta miqdorda jarima toʻlash belgilangan edi, – deydi tumanning Guliston mahallasida yashovchi Donoxon Valixonova. – Jarimani toʻlashga hech qanday imkoniyatim boʻlmagani uchun Jinoyat ishlari boʻyicha tuman sudi raisining sayyor qabulida ushbu summani yengillashtirib berilishini soʻrab, murojaat qildim. Murojaatim yuzasidan ishim qayta koʻrilib, menga nisbatan belgilangan jarima jazosi axloq tuzatish ishlariga almashtirib berildi.

Umuman, murojaatlarning barchasi boʻyicha fuqarolarga zarur tushuntirish va tavsiyalar berilgan. Shuningdek, murojaat qiluvchilarning koʻpchiligi bilan ularning huquqiy madaniyatini yuksaltirish boʻyicha bevosita suhbatlar oʻtkazilgan.

Faxriddin Ubaydullayev, OʻzA