Sirdaryo tumanidagi Prezident Virtual va Xalq qabulxonalariga joriy yilning shu buguniga qadar 3816 ta murojaat kelib tushdi. Ularning 1989 tasi yoki 52 foizi ijobiy hal etildi. Murojaatlar soni o‘tgan yilga nisbatan 502 taga kamayib, 12 foizlik pasayish qayd etildi.

– Aholi murojaatlari asosan tergov harakatlari, ish bilan ta’minlash, sud hujjatlari, aliment undirish, yo‘llarni ta’mirlash, huquqbuzarliklar, davolanish orderlari, ichimlik suvi to‘lovlari, imtiyozli kreditlar va elektr ta’minotidagi uzilishlar bilan bog‘liq masalalarni qamrab olgan, – deydi Sirdaryo tuman Xalq qabulxonasi mudiri Tursunboy Karimov.

Shu davr mobaynida Sirdaryo tumanidagi tashkilot rahbarlari tomonidan 163 marotaba sayyor qabullar o‘tkazilib, 318 dan ortiq fuqaro murojaati tinglandi. Ulardan 241 tasi (75%) ijobiy hal etildi, 52 tasiga tushuntirishlar berildi, qolganlari esa nazoratga olindi.

Muammolarni joyida hal qilishga qaratilgan sayyor qabullar ijtimoiy-iqtisodiy jihatdan rivojlanish darajasi past bo‘lgan mahallalarda ham faol o‘tkazilmoqda. Ijobiy hal etish imkoni bo‘lmagan masalalarni viloyat va respublika darajasida hal etish bo‘yicha choralar ko‘rilmoqda va jamoatchilikka tegishli ma’lumotlar muntazam yetkazib borilmoqda.

Yurtimizda davlat idoralari faoliyatida xalq manfaatlarini ta’minlash ustuvor vazifa sifatida belgilangan. Shu bois Sirdaryo tuman Xalq qabulxonasi aholi bilan yuzma-yuz muloqotlar tashkil etib, murojaatlarning yechimiga katta e’tibor qaratuvchi markazga aylanmoqda.