Ishsizlik, ayniqsa, xotin-qizlar uchun jiddiy muammolardan biri. Biroq shunday ayollar borki, vaziyatdan chiqish uchun faollik ko‘rsatadi, imkoniyat izlaydi va tashabbus ko‘rsatishdan to‘xtamaydi. Sirdaryo viloyati Oqoltin tumanining Shodlik mahallasida istiqomat qiluvchi Nafisa Boyqulova ana shunday shijoatli ayollardan biridir.

U milliy shirinliklarni tayyorlashda ancha tajriba to‘plagan.  Ammo unga kerakli sharoit – ish boshlash uchun binoga ehtiyoj bor edi. Mahalla faollari va “yettilik” guruhi ko‘magida Uchtom qishlog‘idagi foydalanilmayotgan binolardan biri vaqtincha yangi tadbirkor uchun ajratilib, kam miqdorda moddiy yordam ham ko‘rsatildi. Bu esa Nafisa uchun yangi hayot yo‘lini ochdi.

Kam vaqt ichida u mazkur binoda milliy qandolatchilik sexini tashkil etdi. Hozir bu yerda non mahsulotlari, jumladan, chak-chak, tort kabi 20 turdagi shirinliklar tayyorlanmoqda va mahalliy bozorlarga yetkazib berilyapti.  

Nafisa Boyqulova bu ishda yolg‘iz emas, u 5 nafar ishsiz xotin-qizni ish bilan ta’minladi. Ularning har biri hozir yaxshigina daromad topmoqda.

Nafisaning bu tashabbusi mahalladagi boshqa ayollarga ham ilhom bag‘ishladi. Ayrimlar to‘qish, boshqalar tikuvchilik va gulchilik kabi sohalarda ish boshlashga bel bog‘lashdi. Bu esa mahallada xotin-qizlar o‘rtasidagi tadbirkorlik muhitini yaratishda o‘ziga xos namuna bo‘ldi.

– Boshida barchasi qiyin tuyuldi, – deydi Nafisa Boyqulova. – Lekin ishonch va harakat bor joyda yaxshi natija bo‘lar ekan. Meni qo‘llab-quvvatlagan mahalla rahbarlari va mas’ullardan juda minnatdorman. Endigi maqsadim – ishlab chiqarishni yanada kengaytirib, mahsulotlarni xorij bozorlariga chiqarish imkoniyatlarini o‘rganmoqchiman.

Darhaqiqat, ayni paytda u sexga yangi uskunalar olib kelib , yana qo‘shimcha ish o‘rinlari yaratishni rejalashtirgan. Bu esa nafaqat oilaviy farovonlik, balki mahalladagi ijtimoiy barqarorlikka ham ijobiy ta’sir ko‘rsatishi aniq.

Nafisa Boyqulovaning hayoti va faoliyati shunchaki tadbirkorlik emas, u mahalladagi xotin-qizlar hayotini yaxshilashga qaratilgan amaliy namunadir. Agar imkoniyat va ishonch, rag‘bat, shu bilan birga ko‘ngilda intilish, g‘ayrat bo‘lsa, har bir ayol jamiyat taraqqiyotiga munosib hissa qo‘sha oladi. Oila farovonligi va to‘kinchiligi, qolaversa, yurt taraqqiyoti aynan shunday tashabbuslar bilan boshlanadi.