O‘zbekiston Respublikasi Investitsiyalar, sanoat va savdo vazirligida tadbirkorlar, biznes sohasi ekspertlari va iqtisodiyotning turli tarmoqlarida faoliyat yuritayotgan korxonalar vakillarining yoshlar bilan uchrashuvi bo‘lib o‘tdi.

– Ochiq muloqot tarzida tashkil etilgan tadbirda yosh tadbirkorlar tajribali ishbilarmonlar bilan suhbatlashish, ularning ma’ruzalarini tinglash imkoniga ega bo‘ldi, – deydi O‘zbekiston Respublikasi Investitsiyalar, sanoat va savdo vazirligi mutaxassisi Mels Ochilov. – Bu ularning biznes g‘oyalarini rivojlantirishga turtki bo‘lib, O‘zbekiston kelajagini barpo etishga bo‘lgan mas’uliyatini yanada chuqurroq anglashga yordam beradi. Tadbirda Investitsiyalar, sanoat va savdo vazirligiga biriktirilgan poytaxtimizning Yangihayot tumanidagi to‘rtta mahalla yoshlari ham ishtirok etdi. Vazirlik ularga har tomonlama yordam ko‘rsatmoqda. Ya’ni ularning til bo‘yicha o‘quv kurslarida tahsil olishi, ta’lim kontraktlarini to‘lashda ko‘maklashadi, o‘z biznesi yoki ishini boshlashida zarur texnikani taqdim etadi. 

Tadbir doirasida ma’ruzachilar O‘zbekistonda biznes ochish, uni rivojlantirish va yuritishning o‘ziga xos jihatlari to‘g‘risida ma’lumot berdi, biznes-strategiyalar bilan o‘rtoqlashdi. Korzinka supermarketlar tarmog‘i asoschisi Zafar Hoshimov ham biznesni rivojlantirish bilan bog‘liq yondashuvlari xaqida so‘zlab berdi. 

– Bu kabi uchrashuvlarni muntazam o‘tkazish va maqsadli auditoriyani kengaytirish zarur, deb o‘ylayman. Buning natijasida yoshlarda olg‘a intilish, rivojlanish va o‘z Vatani taraqqiyotiga hissa qo‘shish istagi paydo bo‘ladi, – deydi Ivestitsiyalar, sanoat va savdo vazirligining investitsiya loyihalari menejeri Maryam Tillayeva.

Tadbir yakunida taqdirlash marosimi bo‘lib o‘tdi.