Sudyalar oliy kengashi tashabbusi va “Tadbirkor ayol” xalqaro ishbilarmon ayollar assotsiatsiyasi hamkorligida davra suhbati bo‘lib o‘tdi. Unda Sudyalar oliy kengashi mutasaddilari, iqtisodiy sudlar sudyalari, Sudyalar oliy maktabining professor-o‘qituvchilari hamda tadbirkor ayollar ishtirok etdi.

Tadbirda xususiy mulkni har tomonlama himoya qilish, ishbilarmonlik muhitini sifat jihatidan yaxshilash hamda tadbirkorlik sub’ektlarining huquqlarini va qonuniy manfaatlari himoyasi, bu borada qabul qilingan qonun hujjatlari, ularda aks etgan normalarning mazmun-mohiyati xususida so‘z yuritildi.

Shuningdek, iqtisodiy nizolarning kelib chiqish sabablari, ularning oldini olish, sudlarga murojaat qilish tartibi, bu borada yuzaga kelayotgan ayrim muammolar va ularning huquqiy yechimlariga alohida e’tibor qaratildi.

Tadbirkor ayollar huquqlarini himoya qilishda “Tadbirkor ayol” xalqaro ishbilarmon ayollar assotsiatsiyaning vazifa va vakolatlari, ushbu tuzilmaga a’zo ishbilarmon xotin-qizlar faoliyatida duch kelinayotgan ayrim huquqiy muammolar ham o‘rtaga tashlandi.

Qizg‘in o‘tgan savol-javoblar jarayonida tadbirkorlik sub’ektlari faoliyati huquqiy asoslarini yanada mustahkamlanishi, sud amaliyoti, qonun hujjatlarini amaliyotga tatbiq etishdagi ayrim qiyinchiliklar, shundan kelib chiqib, huquqiy hujjatlarga o‘zgartirish va qo‘shimchalar kiritish ehtiyoji, aholining huquqiy savodxonlik darajasini oshirish, iqtisodiy sudlarga taalluqli ishlar doirasiga doir masalalar ham muhokama qilindi.

Tadbir doirasida kengash tashabbusi bilan chop etilgan “Tadbirkorlar huquqi sud himoyasida” hamda “Iqtisodiy sudlarga murojaat qilish tartibi” nomli amaliy qo‘llanmalarning taqdimoti ham o‘tkazildi.

Mazkur qo‘llanmalar nafaqat iqtisodiy sud sudyalari, sud xodimlari, sudyalik lavozimiga nomzodlar va yuridik xizmat xodimlari, balki tadbirkorlik sub’ektlari, shu jumladan, tadbirkor ayollar uchun ham foydali huquqiy manba bo‘lib xizmat qiladi.