Namangan viloyati hokimi Shavkat Abdurazzoqov Yangiqo‘rg‘on tumanida turli masalalar bo‘yicha viloyat hokimi nomiga murojaat yo‘llagan fuqarolarni qabul qildi.

Tumanning Madaniyat markazida qariyb 7 soat davom etgan jarayonda 200 ga yaqin yurtdoshimiz viloyat rahbari bilan yuzma-yuz uchrashib, o‘z muammosi yechimi bo‘yicha ko‘mak so‘radi. Viloyat hokimi ularning har birini qiynayotgan masalani tinglab, hal etish yuzasidan tegishli choralar belgiladi.

– Buyrak yetishmovchiligi bo‘yicha operatsiyadan so‘ng dori-darmon olishga qiynalayotgan edim, - deydi Uychi tumanilik Qobiljon Aliyev. – Ushbu masalada ko‘mak so‘rab viloyat hokimining qabuliga keldim. Shu yerning o‘zida sog‘liqni saqlash boshqarmasi boshlig‘iga topshiriq berilib, murojaatim ijobiy hal etildi. Bundan tashqari, ijarada yashayotganim uchun turar-joy masalasida ham amaliy yordam ko‘rsatiladigan bo‘ldi.

Shuningdek, qabulda fuqarolarning uy-joy, kadastr, qurilish, kredit, moddiy yordam olish, yoshlar ishlari va huquqiy mavzulardagi murojaatlari o‘rganilib, yechimi bo‘yicha mutasaddi idoralar rahbarlariga topshiriq hamda ko‘rsatmalar berildi.