Xatirchi tumanida Ijtimoiy himoya milliy agentligi Navoiy viloyati boshqarmasi rahbari Qahramon Rajabov va viloyat Sog‘liqni saqlash boshqarmasi rahbari Nurali Safoyev ishtirokida sayyor qabul tashkil etildi.

Mamlakatimizda inson qadrini ulug‘lash, xalqning dardu tashvishlarini o‘z vaqtida o‘rganib, ijobiy hal etish ustuvor ahamiyatga aylanib ulgurdi.  

Tumanning Bog‘ishamol mahallasida tashkil etilgan qabulda fuqarolarning tibbiy-ijtimoiy muassasalarda davolanishi va reabilitatsiya dasturini o‘tash uchun yo‘llanma berish, sog‘ligini tiklash uchun moddiy yordam ajratish, protez-ortopediya mahsulotlari va reabilitatsiya texnik vositalari bilan ta’minlash, nogironlikni belgilash masalalariga doir 30 dan ziyod murojaati tinglanib, ularni qonun doirasida hal etish choralari belgilandi. 

–Mirishkor mahallasida istiqomat qilaman, – deydi N.To‘qsonova. – Sayyor qabul bo‘layotganligini eshitib keldim. Oilamizda nogiron farzandim bor. Unga elektr yuritmali aravacha ajratish masalasida murojaat qilgan edim. Murojaatim ijobiy hal etildi. Xursandman

Tumanning olis mahallalaridan biri Ko‘ksaroy mahallasida tashkil etilgan sayyor qabulda esa 18 ta murojaat qabul qilindi.

Tadbir davomida ijtimoiy himoyaga muhtoj aholining muammolari xonadonlariga borgan holda ham o‘rganildi.

Albatta, sayyor qabulda tinglangan har bir murojaat ortida inson taqdiri turibdi. Muammolarni o‘rganishga ana shu nuqtai nazardan yondashilib, fuqarolarning murojaatlarini joyida hal etishga alohida e’tibor qaratildi. Vaqt va mablag‘ talab etadigan muammolar ijrosini ta’minlash bo‘yicha “Yo‘l xaritasi” ishlab chiqilib, nazoratga olindi.