Aholi murojaatlarini o‘rganish, o‘z vaqtida hal etilishiga erishish uchun joylarda “Hududgazta’minot” AJ boshqaruv raisi ishtirokida sayyor qabullar o‘tkazilmoqda. Navbatdagi qabul Buxoro viloyatida bo‘lib o‘tdi.

Sayyor qabulda 100 nafardan ortiq iste’molchi ishtirok etib, 25 dan ortiq murojaat kelib tushdi. Shubhasiz, murojaatlar turli mazmunda bo‘ldi. Yer osti gaz quvurlariga e’tibor berish, yangi xonadonlarga zamonaviy hisoblagich o‘rnatish tartibi, qarzdorlik masalasi, tabiiy gaz bosimini yanada yaxshilash borasidagi ko‘plab murojaatlar o‘rganildi. Har bir o‘rganilgan murojaat yuzasidan ularning amaliy yechimlariga e’tibor qaratildi. Ijobiy jihatdan hal etilishiga erishilgan bo‘lsa, ba’zilari yuzasidan esa belgilangan tartib asosida tushuntirishlar berildi.

–Sayyor qabul haqidagi e’lonni eshitib, ishtirok etdik, –deydi 91 yoshli fuqaro Tesha Fayziyev. –Murojaatlarimiz tinglandi. “Dilkusho” mahalla fuqarolar yig‘inida yashayman. Gaz quvuri bilan bog‘liq murojaatim bor edi. Murojaatni o‘rganish uchun shahar gaz korxonasiga aniq vazifalar belgilab berildi, o‘rganishdi, bartaraf etilishiga erishilmoqda. Juda xursand bo‘ldik. Shunday sayyor qabullarning tashkil etilishi ko‘plab muammolarning bartaraf etilishini ta’minlaydi. 

Sayyor qabul jarayonida iste’molchilarga tabiiy gazni iqtisod qilish yuzasidan zarur tavsiyalar berildi. Energiya samaradorligini oshirish bo‘yicha qo‘shimcha tushuntirishlar o‘tkazildi.