Prezidentimizning joriy yil 24 maydagi “Ma’muriy islohotlar doirasida adliya organlari va muassasalarining mas’uliyatini yanada oshirish hamda ixcham boshqaruv tizimini shakllantirish to‘g‘risida”gi farmoni adliya organlari xodimlarining bu boradagi faoliyat yo‘nalishlarini yanada kengaytirdi, ularning zimmasiga qo‘shimcha vazifalar yukladi.

Endi adliya idoralari fuqarolarning kundalik hayotida uchraydigan huquqiy muammolarni aniqlash, ularni bartaraf etishda yangicha tizim asosida ishlashga o‘tmoqda. Maqsad joylarda aholi ko‘tarayotgan dolzarb muammolarni hal qilish, fuqarolarga bepul birlamchi yuridik yordam ko‘rsatishdir.  

Haftaning chorshanba kuni “Huquqiy targ‘ibot kuni” deb belgilangani bois, Namangan viloyati adliya boshqarmasi ishchi guruhi mahallalarga chiqib, aholining huquqiy muammolarini uyma-uy yurib o‘rganmoqda.

Jumladan, boshqarma rahbari Dilmurod Ahmedov tomonidan Davlatobod tumanidagi Yuksalish mahallasida o‘tkazilgan o‘rganishda fuqarolarning kadastr, nafaqa tayinlash, yordam pulini olish, ehtiyotsizlik oqibatida yo‘qotilgan tug‘ilish, nikoh guvohnomalarini tiklash kabi muammolari aniqlandi. Shu joyning o‘zida mas’ullar biriktirilib, murojaatlar adliya bo‘limining ish yurituviga olindi.

Shuningdek, boshqarma boshlig‘ining birinchi o‘rinbosari Ulug‘bek Ismatullayev tomonidan Norin tumanidagi Furqat, Bobur va O‘zbekiston mahallalaridagi “Xonadonbay” o‘rganishlar davomida fuqarolarning muammolariga quloq tutildi. Xususan, fuqaro I.M nabirasida birinchi guruh nogironligi bo‘lsada, qiziga uni parvarishlaganlik uchun nafaqa tayinlash rad qilinganligini aytdi, yana bir fuqaro M. T. nogironlik aravachasi olishda amaliy yordam so‘radi.

Mingbuloq tumanidagi “Oybek” mahalla fuqarolar yig‘ini hududida joylashgan madaniyat markazida Majburiy ijro byurosi, tuman kambag‘allikni qisqartirish va bandlik bo‘limi bilan hamkorlikda sayyor qabul, ishsiz aholi va yoshlar uchun mehnat yarmarkasi o‘tkazildi.

--Loyiha doirasida mahallalardagi “Yagona ijtimoiy himoya reyestri”, “Ayollar daftari” va “Yoshlar daftari”ga kiritilgan oilalarning muammolari uyma-uy yurish orqali o‘rganilib, ularga huquqiy maslahatlar berildi hamda sayyor davlat xizmatlari ko‘rsatildi,-- deydi Namangan viloyati adliya boshqarmasi mas’ul xodimi Foziljon Jo‘raboyev.-- Bundan tashqari, tuman (shahar) adliya bo‘limi, Yuridik xizmat ko‘rsatish markazi, Fuqarolik holati dalolatnomalarini yozish bo‘limi, Davlat xizmatlari markazi xodimlari, shuningdek, “Madad” NNT xodimlari tomonidan o‘zlariga biriktirilgan mahallalarda o‘rganishlar olib borilmoqda.