Jizzax viloyati soliq boshqarmasi boshlig‘i, 4-sektor rahbari Bekzod Toshpo‘latov Baxmal tumanining bir qator mahallalarida sayyor qabullar o‘tkazdi.

Baxmal tumani mahallalarida o‘tkazilishi rejalashtirilgan sayyor qabul avvalida 4-sektor rahbari “xonadonbay” va “mahallabay” tizim asosida hududlardagi ehtiyojmand, kam ta’minlangan, ijtimoiy daftarlarda turuvchi fuqarolar bilan yuzma-yuz muloqotda bo‘ldi, ijtimoiy ob’ektlardagi vaziyatni o‘rgandi. U xonadonlarda bo‘lib, fuqarolarning muammolarini o‘rganib, imkon qadar o‘sha joyning o‘zida bartaraf etish chora-tadbirlarini ko‘rishga harakat qildi. 

Jumladan, viloyat soliq boshqarmasi boshlig‘i 4-sektor hududidagi “Uzunbuloq” mahalla fuqarolar yig‘iniga qarashli O‘rtaqishloqda istiqomat qiluvchi ijtimoiy himoyaga muhtoj 86 yoshli Xidirboy Elmurodov oilasida bo‘lib, ularning holidan xabar oldi. Otaxonning bir necha yildan beri bemor rafiqasiga viloyat shifoxonasida davolanishi uchun order topshirdi. Shuningdek, yana bir nechta ehtiyojmand oilalarga 11 turdagi oziq-ovqat mahsulotlari taqdim etildi. 

Bekzod Tashpo‘latov boshchiligidagi sektor a’zolari va mutasaddi tashkilotlar vakillari “Uzunbuloq” MFYda joylashgan 47-sonli umumta’lim maktabiga bordi. Ushbu ta’lim muassasasining issiqlik, elektr va ko‘mir ta’minoti, yaratilgan sharoit va dars jarayonlari hamda maktab jamoasining “Tashabbusli byudjet” tanlovi natijalari bilan tanishdi. 

4-sektor hududidagi mazkur maktab jamoasi 2023 yilda o‘tkazilgan “Tashabbusli byudjet” tanlovida “Sinfxonalarni jihozlash, kompyuter va o‘quv uskunalari xarid qilish” loyihasida eng ko‘p –17 mingta ovoz to‘plashga muvaffaq bo‘lgandi. Natijada maktab pedagogik jamoasiga 1 milliard 150 million so‘m mablag‘ ajratildi va zarur o‘quv jihozlari olib kelib o‘rnatildi, sinfxonalar ovozli kuzatuv kameralari bilan ta’minlandi. 

So‘ngra tumandagi 43-sonli umumta’lim maktabida “Uzunbuloq” hamda “Madaniyat” MFY aholisi uchun ommaviy sayyor qabul o‘tkazildi. Unda mahallalar fuqarolari ichimlik suvi, elektr ta’minoti, yo‘llarga shag‘al yotqizish, ta’lim krediti olishda ko‘maklashish, uy-joyning kadastr hujjatlarini rasmiylashtirish bilan bog‘liq 15 dan ziyod murojaat qabul qilindi. Ushbu murojaatlarning 6 tasi joyida yechimini topgan bo‘sa, 3 tasi yuzasidan huquqiy tushuntirish berildi, qolganlari tegishli tartibda nazoratga olinib, mas’ullarga ijro etish yuzasidan aniq vazifalar yuklatildi. 

Shuningdek, tumandagi “Shodlik” MFY “mahalla yettiligi” bilan hududdagi mavjud muammolar atroflicha tahlil qilindi. Tashkil etilgan sayyor qabulda fuqarolar tomonidan ichki yo‘llarga shag‘al to‘kish, serqatnov avtomobil yo‘llarining piyodalar, asosan, o‘quvchilar kesib o‘tadigan qismiga yo‘l belgilari o‘rnatish, ko‘mir va suyultirilgan gaz balonlari bilan ta’minlash, kredit olishda ko‘maklashish, ichimlik suvi ta’minoti kabi qator masalalar yuzasidan murojaatlar qabul qilindi.