2023-yilda respublika bo‘yicha 132,2 km avtomobil yo‘llarini qurish va rekonstruksiya qilish ishlarini amalga oshirish rejalashtirilgan.

Avtomobil yo‘llari qo‘mitasi tomonidan joriy yilning yanvar - avgust oylarida umumiy foydalanishdagi 104 km avtomobil yo‘llarida rekonstruksiya qilish ishlari amalga oshirilgan.

Jumladan, Qoraqalpog‘iston Respublikasi hududidagi A-380 "G‘uzor – Buxoro – Nukus – Beyneu" avtomobil yo‘lining 55 km qismi hamda  Navoiy viloyati hududidagi 4R57 "Qizilqum xalqa yo‘li" avtomobil yo‘lining 8 km qismi rekonstruksiya qilingan.

Bu raqamlarni Axborot va ommaviy kommunikatsiyalar agentligida tashkil etilgan brifingda Avtomobil yo‘llari qo‘mitasi axborot xizmati rahbari Nilufar Jumayeva ma’lum qildi.

Qayd etilishicha, Vazirlar Mahkamasining “2023 yilda yo‘l -transport infratuzilmasi ob’ektlarida qurilish ta’mirlash ishlarini jadallashtirish to‘g‘risida”gi tegishli bayoniga asosan umumiy foydalanishdagi avtomobil yo‘llarini kapital ta’mirlash ishlari olib borilmoqda.

Shu asosda tasdiqlangan dasturga asosan 114,4 km umumiy foydalanishdagi avtomobil yo‘llarida kapital ta’mirlash ishlari amalga oshirilishi rejalashtirilgan. Joriy yil yanvar - avgust oylarida 94 km umumiy foydalanishdagi avtomobil yo‘llarida kapital ta’mirlash ishlari amalga oshirildi.

Shuningdek, Buxoro viloyati hududidagi 4R66 "Azizobod q. - Vobkent sh. - Aliyor q. - Xo‘ja Porso q.A-380 avtoyo‘li (G‘uzor - Buxoro - Nukus - Beyneu)" avtomobil yo‘lining 33 - 38 km qismi, Navoiy viloyati hududidagi 4K376 "Tomdibuloq q. - Pashat q. - Ayaqquduq q." avtomobil yo‘lining 45 - 65km qismi, Namangan viloyati hududidagi 4R119 "Chortoq sh. - Kalishoh q. - Hazratishoh q.-Zarkent q." avtomobil yo‘lining 40 - 50 km qismi to‘la ta’mirlangan.

Ma’lumot uchun: 2022 yil 1 iyuldan “Shaffof yo'l” platformasi test rejimida ishga tushirilgan. Mazkur platformaning alohida sahifasida aholining yo‘llar nosozligi, shuningdek, yo‘llarda va yo‘l bo‘yida xavfsiz harakatlanish uchun yuzaga kelgan favqulodda texnik muammolar haqida foto va videomurojaatlari joylanadi. Shu tariqa sohadagi muammolar jamoatchilik fikri asosida aniqlanadi va hal etiladi.