Davlat idoralarining xalqqa yanada yaqin bo‘lishi, aholi muammolarini yechishning samarali tizimini yaratish maqsadida o‘tkazilayotgan sayyor qabullar o‘z samarasini bermoqda.

Kadastr agentligi va Davlat kadastrlari palatasi Toshkent shahar boshqarmalari tomonidan ham jismoniy va yuridik shaxslarning murojaatlariga alohida e’tibor qaratilyapti. Tasdiqlangan reja-grafik asosida aholi va tadbirkorlarning sohaga oid murojaatlari sayyor qabullar o‘tkazish orqali o‘rganilyapti. Muhim jihati, tadbir o‘tkaziladigan manzil va unda ishtirok etadigan mutasaddilar haqidagi ma’lumotlar ijtimoiy tarmoqlar orqali keng yoritilib, aholining xabardorligi ta’minlanyapti.  

Jumladan, Yunusobod tumanida bo‘lib o‘tgan navbatdagi qabulda 20 ga yaqin fuqaroning murojaatlari tinglandi. Ochiq va samimiy muloqot tarzida kechgan qabulda ko‘chmas mulkni ro‘yxatdan o‘tkazish, kadastr pasportini rasmiylashtirish, mulkka egalik huquqini olish, yerni xususiylashtirish va boshqa masalalardagi murojaatlar yuzasidan tegishli huquqiy tushunchalar berildi.  

E’tiborlisi, murojaatlarning aksariyati joyida hal etildi. Bundan tashqari, yig‘ilganlarga qonunchilikdagi yangilik va o‘zgarishlar haqida batafsil ma’lumot berildi.