Andijon viloyati hokimi Shuhratbek Abdurahmonov Andijon tumanidagi “Saydulobod” mahalla fuqarolar yig‘ini hududida joylashgan “Orol” oilaviy shifokorlik punktida olib borilayotgan qurilish-ta’mirlash ishlari bilan tanishdi.

Keyingi yillarda mamlakatimizda aholiga ko‘rsatilayotgan tibbiy xizmat sifatini oshirish, tibbiyot muassasalari uchun moslashtirilgan binolar qurish, moddiy-texnik bazasini mustahkamlash borasida keng ko‘lamli ishlar olib borilmoqda. Jumladan, Andijon viloyatida ham qishloq va oilaviy tibbiyot maskanlarini kapital ta’mirlash, zamonaviy jihozlar bilan ta’minlash masalalariga alohida e’tibor qaratilmoqda.  

“Orol” oilaviy shifokorlik punkti Andijon tumanidagi chekka hududlardan birida joylashgan bo‘lib, ancha ta’mirtalab holga kelib qolgan edi. Ana shundan kelib chiqib, qolaversa, mahalla aholisiga ko‘rsatiladigan tibbiy xizmat sifatini yanada yuksaltirish maqsadida mazkur maskanda qurilish-ta’mirlash ishlari amalga oshirilmoqda.  

Viloyat hokimi oilaviy poliklinikadagi qurilish-ta’mirlash ishlarining borishi bilan tanishib, belgilangan ishlarni sifatli va o‘z muddatida yakunlash yuzasidan topshiriq va tavsiyalar berdi.