Buxoro viloyati Olot tumanidagi Usmonshayx mahalla fuqarolar yig‘inida sayyor qabul o‘tkazildi.

Viloyat Adliya boshqarmasi tomonidan o‘tkazilgan tadbirda murojaatlarning aksariyati yer munosabatlari, ko‘chmas mulkka bo‘lgan huquqlarni davlat ro‘yxatidan o‘tkazish, tadbirkorlik, ichki yo‘llarni ta’mirlash, ish bilan ta’minlash, elektr va gaz ta’minoti sohalarida bo‘ldi.

— Qishlog‘imizda elektr bosimi pastligi sababli yangi transformator o‘rnatilishida amaliy yordam so‘rab murojaat qildim,  – deydi Qipchoq mahallasida yashovchi fuqaro Rajabboy Bozorov. – Qipchoq qishlog‘ida elektr ta’minoti sifatini yaxshilash maqsadida transfarmator o‘rnatilishi masalasi tuman elektr tarmoqlari filiali mas’ullari tomonidan joyiga chiqib o‘rganildi. Ijobiy hal etish bo‘yicha aniq choralar belgilandi.  

Usmonshayx mahallasida yashovchi fuqaro Dilmurod O‘rayev asalarichilikni rivojlantirish uchun 20 million so‘m miqdorida kredit olishda amaliy yordam so‘rab qilgan murojaati tuman hokimligi va bank xodimlari tomonida hal etish uchun ish yurituvga qabul qilindi.

Bundan tashqari, aholiga sayyor tartibda davlat xizmatlari ham ko‘rsatildi. Bolani bog‘chaga joylashtirish, elektron raqamli imzo sertifikatini olish, kadastr pasportini shakllantirish kabi sohalarda 10 ga yaqin davlat xizmatlari ko‘rsatildi.

Shu kuni qo‘shimcha o‘rganish talab etadigan 10dan ortiq murojaatlar ish yurituvga qabul qilindi.