Oliy Majlis Qonunchilik palatasining majlisida ko‘rib chiqilayotgan Konstitutsiyaviy qonun loyihasi yuzasidan siyosiy partiyalar fraksiyalari rahbarlari fraksiya pozitsiyasini, munosabatini bayon qilmoqda.

Fraksiyalar rahbarlari qayd etganidek, yangilanayotgan Konstitutsiyada ko‘zda tutilayotgan normalar har bir siyosiy partiya dasturiy vazifalariga hamohang, elektorat manfaatlariga munosib.  

—  Yangilanayotgan Konstitutsiyada "O‘zbekiston — ijtimoiy davlat" degan konstitutsiyaviy tamoyil muhrlanayotgani va davlatning ijtimoiy sohadagi majburiyatlari bilan bog‘liq normalar bir necha barobarga oshayotgani alohida e’tiborga molik, — dedi O‘zXDP fraksiyasi rahbari Ulug‘bek Inoyatov. — Loyihada ijtimoiy birdamlik g‘oyasi ilgari surilmoqda. Qayerdaki ijtimoiy birlik bo‘lsa, o‘sha yerda farovonlik, rivojlanish bo‘ladi. Yangilanayotgan Konstitutsiyaning qator me’yorlarida kambag‘allikni qisqartirish, bandlikni ta’minlash, ishsizlikdan himoya qilish, pensiya, nafaqa va boshqa ijtimoiy yordamlar miqdori eng kam iste’mol xarajatlaridan oz bo‘lishi mumkin emasligi belgilab qo‘yilmoqda.  

Davlat zimmasiga aholi ijtimoiy ehtiyojmand toifalarining hayot sifatini oshirish, nogironligi bo‘lgan shaxslarning jamiyat va davlat hayotida to‘laqonli ishtirok etishi uchun shart-sharoitlar yaratish choralarini ko‘rish majburiyati yuklanmoqda. Shuningdek, fuqarolar tibbiy yordamning qonunda kafolatlangan hajmini bepul olishga haqli ekanligi qat’iy belgilanmoqda.  

Shuningdek, majlisda boshqa fraksiyalar rahbarlari ham so‘zga chiqib, o‘z munosabatini bildirib, deputatlarni yangilanayotgan Konstitutsiya loyihasini qo‘llab-quvvatlashga chaqirdi.