Davlat kadastrlari palatasi Surxondaryo viloyati boshqarmasi xodimlari tomonidan aholi murojaatlarini o‘z vaqtida o‘rganish va ularga yechim topish, aholini qiynab kelayotgan muammolarni qonun doirasida bartaraf etish borasida qator chora-tadbirlar amalga oshirilmoqda.

Xususan, Bandixon tumanida aholi uy-joylarining kadastr hujjatini rasmiylashtirib berish bo‘yicha qilingan murojaatlar ishchi guruh tomonidan o‘rganildi.

Ta’kidlash joiz, boshqarmaga joriy yilning shu kuniga qadar jami 38 ta murojaat kelib tushgan bo‘lib, shundan 28 tasi ijobiy hal etilgan, qolgan 10 tasiga huquqiy tushuntirish berilgan.

– Maqsadimiz har bir fuqaro mulkiy hujjatga egalik qilish orqali qonuniy vakolatidan foydalanish, haq-huquqini talab qilib, foydali kelishuvga erishish imkoniga ega bo‘lishini ta’minlashdir, - deydi Davlat kadastrlari palatasi Surxondaryo viloyati boshqarmasi axborot xizmat rahbari Behruz Safarov. – Ko‘chmas mulkka bo‘lgan huquqni davlat ro‘yxatidan o‘tkazish uchun o‘z vaqtida murojaat etmaslik fuqarolarga bazaviy hisoblash miqdorining 10 baravari (3 million so‘m), mansabdor shaxslarga esa 15 baravari (4 million 500 ming so‘m) miqdorida jarima solinishiga sabab bo‘ladi. Shunday ekan, har bir fuqaro yoki mansabdor shaxs belgilangan tartibda va o‘z vaqtida bino-inshootlarini davlat ro‘yxatidan o‘tkazishi zarur.