Jizzax viloyati uchinchi sektor rahbari, ichki ishlar boshqarmasi boshlig‘i, general-mayor G‘ayrat Qodirov ishni mahallabay tizimi asosida tashkil etgan.

G‘allaorol tumani “Oqtosh” mahalla fuqarolar yig‘ini aholisi bilan o‘tkazilgan navbatdagi muloqotda ham mavjud  muammolar va ularni bartaraf etish choralari muhokama qilindi.

Sektor rahbari dastlab tijorat banklari tomonidan 33 million so‘mdan ajratilgan kredit mablag‘i evaziga fuqarolar tomonidan barpo etilgan issiqxonalar faoliyati bilan tanishdi. Oqtoshlik fuqarolarning xonadonlarida bo‘lib, issiqxonalardagi ahvol, ekinlar parvarishi, kredit mablag‘larining to‘g‘ri yo‘naltirilishini o‘rgandi.

O‘z uyida tikuvchilik sexini ochgan Mavjuda Abdullayeva xonadonida bo‘lib, u yerdagi tikuvchi xotin-qizlarga yaratilgan sharoitlar bilan tanishdi. Ushbu tikuvchilik sexi Marjonbuloq shaharchasida joylashgan kichik korxonaning bo‘limi hisoblanadi. Tadbirkor Yulduz Tog‘ayeva boshqarayotgan Marjonbuloqdagi kichik korxonada “Oqtosh” bo‘limida mehnat qilayotganlar bilan qo‘shib hisoblaganda 50 kishi mehnat qilmoqda. Jamoa a’zolari tomonidan kuniga 250 dona erkaklar kurtkasi tayyorlanib, mahsulotning bir qismi Tojikistonga eksport qilinayotgan bo‘lsa, qolgan qismi buyurtma va ichki bozorda sotilmoqda.

G‘ayrat Qodirov qishloq tadbirkorlari bilan uchrashib, muammolari bilan qiziqdi, ishlab chiqarish jarayonlari, ish o‘rinlari, ishchi-xizmatchilarga yaratilgan sharoitlarni o‘rgandi va ularga har tomonlama yordam ko‘rsatilishini bildirdi. “Oqtosh” mahalla fuqarolar yig‘ini hududida mahalliy tadbirkorlar tomonidan ishlab chiqarilayotgan sanoat, qurilish, qishloq xo‘jaligi mahsulotlari, hunarmandchilik namunalari ko‘rgazmasi bilan tanishdi. 

Shu kuni 3 kishiga nogironlik aravachasi, “Yoshlar daftari” ro‘yxatidagi 2 kishiga haydovchilik kursida o‘qish uchun yo‘llanma, 5 nafar talabaga oliy ta’lim muassasasi kontrakt to‘lovining to‘langan, yana 2 kishiga issiqxona barpo etish uchun kredit ajratilganligi haqida sertifikatlar, bundan tashqari, ehtiyojmand 2 oila farzandiga maktab formasi topshirildi. Shuningdek, Prezidentimiz tomonidan ilgari surilgan 5 ta muhim tashabbus doirasidagi tadbirlarda faol ishtirok etgan oqtoshlik yoshlar rag‘batlantirildi. 

Aholi bilan o‘tkazilgan sayyor qabulda G‘allaorol tumani hokimligi va mutasaddi tashkilotlar rahbarlari, mahalla fuqarolar yig‘iniga biriktirilgan tuman hokimi yordamchisi va yoshlar ishlari agentligi vakili hamda mahalla fuqarolari ishtirok etdi. Murojaatchilar ichimlik suvi, elektr energiyasi ta’minotini yaxshilash, turar joy qurish, dehqonchilik va fermerlik bilan shug‘ullanish uchun yer maydoni ajratish, kadastr hujjatlarini rasmiylashtirish, tibbiy va moddiy ko‘mak olish, ichki yo‘llarni ta’mirlash yuzasidan talab va takliflarini bildirdi. 

Kadastr hujjatlarini rasmiylashtirish, tibbiy va moddiy ko‘mak olish masalalari shu joyning o‘zida ijobiy hal qilindi. Qolgan masalalar tegishligiga ko‘ra  mutasaddilarga yuklatildi va ijro muddatlari belgilandi. 

So‘ng “Oqtosh”dagi bir necha turar joy va ko‘chalarda sayyor qabulda ko‘tarilgan masalalar o‘rganildi va muammolarni hal etishga doir “yo‘l xaritasi” ishlab chiqildi.

G‘ayrat Qodirov G‘allaorol tumani “Katta qizil buloq” qishlog‘idagi Forish hamda Samarqand viloyatining Payariq tumanlari bilan bog‘lovchi yo‘lni ta’mirlash ishlari bilan ham tanishdi.