Prezidentimiz tashabbusi bilan pandemiya vaqtida aholining ijtimoiy qiynalgan qismini, ko‘p farzandli oilalar, nogironligi bor, doimiy ish joyini yo‘qotgan shaxslarni qo‘llab-quvvatlash, ularni dori-darmon va kundalik oziq-ovqat mahsulotlari bilan ta’minlash maqsadida "Mahalla" xayriya jamoat fondi uning hududiy bo‘limlari huzurida tashkil etilgan “Saxovat va ko‘mak" jamg‘armasi fuqarolarning ko‘makchisiga aylangan.

Birgina, "Mahalla" xayriya jamoat fondi Sirdaryo viloyat boshqaruvi uning tuman va shahar bo‘linmalari huzurida tashkil etilgan "Saxovat va ko‘mak" jamg‘armasi hisobidan joriy yilning olti oyi mobaynida 593 ming 566 nafar fuqaroga 12 milliard 508 million so‘mlik yordam ko‘rsatildi.

Bundan tashqari jamg‘armadan Boyovut tumanidagi "Yangi hayot" va "Qaropchi" mahalla fuqarolar yig‘iniga 139 million so‘mlik kompyuter va mebellar jamlanmasi olib berildi.

– Bunday misollarni ko‘plab keltirish mumkin, – deydi "Mahalla" xayriya jamoat fondi Sirdaryo viloyat boshqaruvi raisi Bahodir To‘xtasinov. – Masalan, sog‘ligida muammosi bor, davolanishga muhtoj, ammo imkoniyati yo‘q xovoslik fuqaro yordam so‘rab, xalq deputatlari Xovos tuman Kengashiga murojaat qilgandi. Uning murojaati javobsiz qolmadi. Qisqa fursatda Kengash qarori chiqarildi. Unga davolanish va sog‘ligini tiklab, o‘z oilasi bag‘riga qaytishi uchun "Mahalla" xayriya jamoat fondi Sirdaryo viloyat boshqaruvi, uning Xovos tuman bo‘linmasi huzurida ochilgan "Saxovat va ko‘mak" jamg‘armasi hisobidan 20 million so‘m pul mablag‘i ajratib berildi. Natijada u ushbu pul mablag‘i hisobiga davolash profilaktika muassasasida davolanib, o‘z oilasi bag‘riga qaytdi. Bundan nafaqat u, uning yaqinlari ham birdek xursand.

"Saxovat va ko‘mak" jamg‘armasi fuqarolar uchun ko‘makchiga aylanib ulgurdi.