Jizzax viloyatining shahar va tuman hokimlari umumta’lim maktablari bitiruvchi sinf o‘quvchilari bilan uchrashuvlar o‘tkazmoqda.

Jumladan, Do‘stlik tumani hokimi Shavkat Darvishev sektorlar rahbarlari hamrohligida “Navro‘z”, “Bog‘zor”, “Qahramon” mahalla fuqarolar yig‘inlari hududidagi umumta’lim maktablarini tamomlayotgan bitiruvchi yoshlar bilan uchrashdi.

Tadbirda keyingi yillarda mamlakatimizda yoshlarning bilim olishi, yosh iqtidor egalarining iste’dodini har tomonlama qo‘llab-quvvatlashga qaratilgan davlat siyosati haqida so‘z bordi.

– Biz yoshlarimizni bilimli, ertangi kunimizning munosib egalari bo‘lib kamol topishida bor imkoniyatlarimizni ishga solamiz, – deydi tuman hokimi Shavkat Darvishev. – Ularni har jihatdan qo‘llab-quvvatlashga tayyormiz. Har biringizni, endigina qadam tashlayotgan mustaqil hayotda o‘z o‘rningizni topishingiz uchun barcha choralarni ko‘ramiz.

Mazkur tadbir yakunida namunali xulqi, turli madaniy-ma’rifiy tadbirlarda faol ishtirok etgani, shuningdek, maktab hayotida “O‘zini-o‘zi rivojlantirish” tamoyili asosida o‘zidan munosib iz qoldirgani uchun bir guruh o‘quvchi yoshlarga tuman hokimining tashakkurnoma va esdalik sovg‘alari topshirildi.

Viloyatdagi boshqa shahar va tumanlarda ham hokim va bitiruvchi yoshlarning uchrashuvlari davom etmoqda.