Toshkent viloyatida aholi bilan yaqindan muloqot qilish, ularning muammolarini tinglash va hal etish maqsadida Parkent tumani "Qiziltog‘" qo‘rg‘onida yashovchi fuqarolar uchun ommaviy sayyor qabul bo‘lib o‘tdi.

Viloyat hokimi vazifasini bajaruvchi Zoyir Mirzayev ishtirokida o‘tkazilgan ochiq muloqotlarda aholi sog‘liqni saqlash, moddiy-ko‘mak, uy-joy va maishiy turmush muammolari, kommunal xo‘jalik, bandlik, tadbirkorlik, kredit olishga doir qator masalalar bilan murojaat qildi. Shu bilan birga, muloqotda tibbiy xizmat, kredit ta’minoti, uy-joyga doir bir qancha masalalar ham o‘z yechimini topdi.

Xususan, "Oydin" mahallasida yashovchi Feruza Olimova ajrim natijasida uy-joysiz qolgani, xonadonini sobiq turmush o‘rtog‘idan qaytarib olishda muammolarga duch kelayotgani haqida aytib o‘tdi. Mazkur murojaat viloyat hokimi va tegishli tashkilot mutasaddilari ishtirokida atroflicha muhokama qilinib, Feruza opaga qonun talabidan kelib chiqib, amaliy yordam beriladigan bo‘ldi.

"Fayzobod" mahallasida yashovchi Zulayho Mingyasharovaning oilaviy sharoitini inobatga olib, viloyat hokimi 5 million so‘m pul mablag‘ini moddiy yordam sifatida ajratish yuzasidan tegishli ko‘rsatma berdi. Shuningdek, o‘g‘lini davolatish uchun amaliy yordam so‘rab kelgan Feruza Tursunboyevaga 12 million so‘m beriladigan bo‘ldi.