O‘zbekiston Respublikasi Prezidenti Administratsiyasi mas’ul xodimlari boshchiligidagi ishchi guruhning navbatdagi ommaviy qabuli Bo‘stonliq tumanidagi "Xo‘jakent" mahalla fuqarolari yig‘inida davom etdi.

Unda Bo‘stonliq, Qibray tumanlari va Chirchiq shahridan kelgan aholining murojaatlari tinglandi.

Bu kabi ochiq muloqotlar joylardagi aholi murojaatlariga ijobiy yechim topish, to‘planib qolgan muammolarni tegishli mas’ullar ishtirokida hal etilishiga sharoit yaratmoqda.

– Sayyor qabullar kutilgan natija bermoqda, – deydi viloyat Tibbiy ijtimoiy xizmatlarni rivojlantirish boshqarmasi boshlig‘i Ibrohim Iminov. – Xususan, qabul boshlangan kundan buyon sohamizga aloqador bo‘lgan 65 nafar fuqarodan 63 tasining muammolari ijobiy hal etildi. Ikki nafarining arizasi yuzasidan o‘rganish olib borilmoqda. Bugun ertalabdan boshlangan ochiq muloqotlar davomida shu vaqtga qadar nogironlik aravachasi, davolanish uchun ruxsatnoma olish kabi 18 ta ariza qabul qilgan bo‘lsak, barchasini o‘z joyida hal etdik.

Bo‘stonliq tumani aholisi murojaatlari hududning tabiiy sharoitdan kelib chiqqan holda, ish o‘rni yaratish, turizm, mehmonxona qurish, tadbirkorlik faoliyati bilan bog‘liq tashabbuslarni qo‘llab-quvvatlash yuzasidan takliflar bildirildi.

Muloqotlarda vazirlik, idora rahbarlari, viloyat Xalq qabulxonasi, sektor vakillari, viloyat korxona, tashkilot, muassasa va huquqni muhofaza qiluvchi organlar mutasaddilari aholining murojaatlarini atroflicha o‘rganib chiqmoqda.