O‘zbekiston Respublikasi Prezidenti Administratsiyasi mas’ul xodimlari boshchiligidagi ishchi guruhning Bekobod shahri, Bekobod, Bo‘ka va Piskent tumanlari uchun Bo‘ka tumanidagi "Bo‘ston" mahallasida ommaviy qabul tashkil etildi.

Unda 20 dan ziyod vazirlik va idoralar rahbarlari murojaatchilar bilan yuzma-yuz gaplashib, har bir masala hududiy mas’ullar bilan birga muhokama qilindi. 
Bekobod shahrida yashovchi Bahrom Abduhamidov fuqaroligi bo‘lmagan. 

Uning shu masalada ichki ishlar vazirligi mas’ullariga qilgan murojaati ijobiy hal etildi. Unga fuqarolik pasporti topshirildi. 

Bo‘ka tumanidagi "Istiqlol" mahallasidagi 48-sonli umumta’lim maktabi binosi qamrovi 180 o‘ringa mo‘ljallangan. Biroq ayni vaqtda u yerda 307 nafar o‘quvchi ta’lim oladi. Deputat Dilfuza Rahmonovaning sa’y-harakati, qilgan murojaatlari shu yerda yechim topdi. Endi bino yetishmasligi sabab hududdagi QVP binosida tahsil olayotgan o‘quvchilar uchun xushxabar bor. Xalq ta’limi vazirligi mas’ullarining aytishicha, qo‘shimcha bino 2023 yil davlat dasturi asosida quriladi. 

“Jag‘albayli” mahallasida istiqomat qiluvchi Baxtiyor Soyipov ommaviy qabulda xonadoniga internet tarmog‘i ulab berishni so‘radi. Shu kunning o‘zida soha xodimlari tomonidan mahallaning "Yoshlik" ko‘chasidagi 216 ta xonadonga internet tarmog‘i tortildi. O‘zbekiston Oila va xotin-qizlar davlat qo‘mitasi tomonidan ham ayollarga daxldor qator masalalar ko‘rib chiqildi. 

Masalan bo‘kalik Shahnoza Almanova 20 yil o‘qituvchi bo‘lib ishlagan. Biroq ma’lumoti o‘rta-maxsus bo‘lgani bois Xalq ta’limi bo‘limi tomonidan ogohlantirish olgan edi. Unga oliy ta’limga o‘qishga kirish uchun tavsiya beriladigan bo‘ldi. Shuningdek, Sog‘liqni saqlash vazirligi mas’ullari tomonidan 20 dan ortiq muammolar hal etildi. Bo‘kalik 2- guruh nogironi Zulxumor Abduvaliyeva yurak xastaligi bilan og‘rib keladi.

U endi Toshkent tibbiyot akademiyasida imtiyozli ravishda jarrohlik amaliyotini o‘tkazadi. Yoki bo‘kalik Ibrohim Tojiboyevning onkologik dispanserda davolanish bo‘yicha murojaati ijobiy hal etildi. Bekobodlik Muyassar Abdusattorova "Ayollar daftari" da ro‘yxatda turadi. Oilaviy sharoitining og‘irligi sababli uy ta’miri yuzasidan mas’ullarga yuzlandi. 

Tez orada muammo yechim topishi mas’ullar zimmasiga yuklatildi. Bosh prokuraturaga Bekobod shahar "Buloq-ariq" mahallasida yashovchi nogironligi bo‘lgan shaxs Halima Jo‘rayeva uy-joyga muhtojligini bildirdi. Shu joyning o‘zida Halimani o‘zi yashayotgan hududdan bir xonali xonadon ajratilishi ma’lum qilindi.