Andijonda O‘zbekiston Respublikasi Tibbiy-ijtimoiy xizmatlarni rivojlantirish agentligi direktori o‘rinbosari G‘.Isroilov hamda Agentlikning viloyat boshqarmasi boshlig‘i Sh.Nasriddinov ishtirokida sayyor qabul o‘tkazildi.

Sayyor qabulda nogiron, ijtimoiy muhofazaga muhtoj 150 nafarga yaqin fuqarolarning murojaatlari eshitildi. Murojaatlar bo‘yicha bildirilgan muammolarning aksariyati ijobiy hal etildi, bir qator masalalarni hal etish choralari ko‘rildi. 

Sayyor qabul davomida murojaatlar asosida 30 nafar fuqaroga nogironlik aravachasi, eshitish qobiliyati zaif 30 nafar kishiga maxsus eshitish moslamasi, 30 nafar fuqaroga hassa va qo‘ltiq tayoq, 15 nafar murojaat qiluvchiga esa salomatligini tiklash uchun dam olish sihatgohiga yo‘llanmalar berildi. Bundan tashqari, 8 nafar fuqaroga nogironlik belgilandi, 2 nafar fuqaroga davolanishi uchun tibbiyot muassasalariga yo‘llanma berildi. 

O‘tkazilgan sayyor qabul ijtimoiy himoyaga muhtoj aholi vakillarini qiynayotgan muammolarini hal etish, og‘irini yengil qilish, ularning hayotga, ertangi kunga bo‘lgan ishonchini yanada mustahkamlashga xizmat qildi.