Buxoro viloyati Olot tumani “Pichoqchi” mahalla fuqarolar yig‘inida Buxoro viloyati prokurori Mahmud Istamov sayyor qabul o‘tkazdi.

Qabulda davlat va xo‘jalik boshqaruvi organlari, tuman hokimligi mutasaddilari va fuqarolar qatnashdi. Aholi muammolarini hal etishga alohida e’tibor qaratildi. Fuqarolarning ijtimoiy yordam, elektr ta’minoti, gaz, ichki yo‘llar kabi masalalar bo‘yicha murojaatlari tinglandi. Murojaatlarning aksariyati joyida hal etildi. Muddat talab etiladigan muammolarning bartaraf etilishi yuzasidan prokuraturaning sohaviy xizmatlariga hamda tumanning tegishli mutasaddi tashkilot va idoralariga topshiriqlar berildi. Ayrim murojaatlarning ijrosi nazoratga olindi.

– Qo‘shnim menga o‘tish uchun yo‘l bermayotganligi bilan bog‘liq holat yuzasidan viloyat prokuroriga murojaat qildim, – deydi Olot tumani “Pichoqchi” MFYda yashovchi Gulnora Zaripova. – Holat mutasaddilar tomonidan o‘rganildi. Sudda hal qilinishi ta’minlandi. 

Shuningdek, sayyor qabul doirasida pichoqchiliklar uchun chuqurlashtirilgan tibbiy ko‘rik hamda arzonlashtirilgan narxlardagi qishloq xo‘jaligi mahsulotlari yarmarkasi o‘tkazildi. Yarmarkada 20 turdan ortiq arzonlashtirilgan oziq-ovqat mahsulotlari sotuvga chiqarildi. 

Tadbir doirasida tumanning chekka hududi “Pichoqchi" mahalla fuqarolar yig‘inida doimiy ravishda suyultirilgan gazdan foydalanib kelayotgan aholiga suyultirilgan gaz ballonlari yetkazib berildi. Mahalla yoshlarining bo‘sh vaqtini mazmunli tashkil etish maqsadida bir qator ommaviy sport tadbirlari uyushtirildi. Kurash va mini futbol bo‘yicha “Prokuror kubogi” musobaqalari o‘tkazildi. Tadbir yakunida viloyat prokurori tomonidan 3 nafar yoshlarning bandligini ta’minlash maqsadida tikish mashinasi hamda o‘t o‘rish uskunasi berildi.

– Boquvchimni yo‘qotganman, – deydi Olot tumani “Nurobod” MFYda yashovchi Maftuna G‘aniyeva. – Sayyor qabulda murojaat qilgandim. Hunarim borligi inobatga olingan holda tikuv mashinasi berildi. Endi qishloq ayollarining tikish-bichish ishlarini bajaraman. Oilamga daromad olib kelaman. Shu bilan o‘zimni o‘zim band qilaman. 
Shuningdek, Olot tumanida yashovchi Burxon Salomatovga o‘t o‘radigan apparat olib berildi. Endi Burxon Salomatov qishloqdoshlarining tomorqalaridagi o‘tlarni o‘rib, o‘zini o‘zi band qiladi.