Sirdaryo viloyatida fuqarolarning sud-huquq sohasidagi murojaatlariga samarali yechim topish uchun Respublika ishchi guruhi tomonidan ommaviy sayyor qabullar o‘tkazilmoqda.

Ilk uchrashuvda Sirdaryo va Sayxunobod tumanlari aholisi qabul qilinib, fuqarolarning sohaga oid murojaat va muammolari o‘rganildi.

Fuqarolarning 10 nafari jinoyat, 5 nafari fuqarolik, 1 nafari iqtisodiy ishlar bo‘yicha sudlarga oid murojaat qildi. Murojaatlardan 8 tasi yuzasidan huquqiy tushuntirish berildi, 6 ta murojaat Oliy sud tomonidan kassatsiya tartibida hal qilish uchun qabul qilindi. Ushbu murojaatlarning barchasi qanoatlantirilib, tegishli sudlov hay’atiga ko‘rib chiqish uchun o‘tkazildi va qayta o‘rganish maqsadida fuqarolarning 2 ta arizasi olindi.

Guliston shahrida davom etgan ommaviy qabullarda Guliston shahri, Guliston va Boyovut tumanlari aholisining murojaatlari o‘rganildi.

Murojaatlarning 21 tasi jinoyat, 4 tasi fuqarolik, 1 tasi ma’muriy ishlar buyicha sudlarga oid. 13 nafar fuqaroning og‘zaki murojaati, 7 nafar fuqaroning yozma murojaati qabul qilinib, 6 nafar shaxsga nisbatan sayyor sud majlisi o‘tkazildi. Murojaatlardan 13 tasi bo‘yicha huquqiy tushuntirish berilib, 6 ta murojaat joyida ijobiy hal etilib, qanoatlantirildi. 3 ta murojaat Oliy sud tomonidan kassatsiya tartibida xal qilish uchun qabul qilindi.

Shuningdek, sayyor qabullar davomida o‘tkazilgan sayyor sud majlislarida jinoyat ishlari bo‘yicha Sayxunobod tuman sudi tomonidan 4 nafar, jinoyat ishlari bo‘yicha Guliston tuman sudi tomonidan 2 nafar shaxs jazoni o‘tashdan muddatidan ilgari shartli ravishda ozod qilindi. 

Qabul davomida fuqarolarning sud-huquq sohasidagi murojaatlarining ayrimlariga shu joyning o‘zida yechim topilgan bo‘lsa, qo‘shimcha o‘rganish va muddat talab etadigan masalalar mas’ul tashkilotlar tomonidan nazoratga olindi.

– Sudyalar viloyatimizda sayyor qabul o‘tkazayotganini eshitib, ularga murojaat qildim, – deydi Sattor Boboyev. – 2020 yilda "Baxt Yuksalish klasterida 17 million atrofida ish haqimiz qolib ketib, shuni ololmay sarson bo‘lib yurgan edik. Ish haqimiz fuqarolik sudi tomonidan ko‘rib chiqilib, undirib beriladigan bo‘ldi.

– Bir necha yillar oldin sudlangan edim, – deydi A.Mamatqulova. – Aybsiz ekanimni isbotlab Oliy sud tomonidan qisman oqlangan edim. Oliy sud raisi o‘rinbosaridan to‘liq oqlanishimga amaliy yordam so‘radim. Hujjatlarimni ko‘rib chiqib qonun doirasida yordam berilishini bildirishdi.

Ommaviy sayyor qabullar Mirzaobod tumani va Yangiyer shahrida ham bo‘lib o‘tdi.