Mamlakatimizda mahalliy ijroiya hokimiyati organlari rahbarlari o‘rinbosarlari faoliyatining eng muhim samaradorlik ko‘rsatkichlari ishlab chiqilib, ularning natijalari baholanmoqda.

Bunda Prezidentimizning 2021 yil 24 avgustda qabul qilingan “Mahalliy ijroiya hokimiyati organlari rahbarlari o‘rinbosarlarining ularga yuklangan vazifalarni bajarishda shaxsiy mas’uliyatini kuchaytirish bo‘yicha qo‘shimcha chora-tadbirlar to‘g‘risida”gi qarori muhim ahamiyat kasb etmoqda. 

Farg‘ona viloyati hokimi o‘rinbosarlarining 2021 yil IV–chorak va yil yakunlari bo‘yicha faoliyati eng muhim samaradorlik ko‘rsatgichlari asosida baholandi. Xalq deputatlari viloyat kengashining navbatdagi sessiyasida viloyat hokimi Xayrullo Bozorov bu haqida ma’lum qildi.

  Viloyat hokimi o‘rinbosarlari funksional vazifalarni bajarib, yaxshi ko‘rsatgichlarga erishgan. Birgina viloyat hokimining o‘rinbosari-mahalla va oilani qo‘llab-quvvatlash boshqarmasi boshlig‘i B.Xoliqovning umumiy samaradorlik ko‘rsatgichi qoniqarsiz baholangan. 

–Har bir rahbar zimmasidagi mas’uliyatga chuqur yondashgan holda amaliy natija uchun ishlashi kerak, – deydi viloyat rahbari. – Quruq va’dalar, hisobotlarni endi hech kim ko‘tarmaydi. Bundan buyon nafaqat, ijroiya hokimiyati, balki tashkilot va boshqarmalarning faoliyati ochiq va shaffoflik bilan baholab boriladi, ularning reytinglari aniqlanadi.