Samarqand viloyat sudi mas’ullarining navbatdagi sayyor qabuli

Urgut tumani Xalq qabulxonasida tashkil etildi. Unda viloyat sudi raisi o‘rinbosari T.Bayzoqov va viloyat sudining fuqarolik ishlari bo‘yicha sudlov hay’ati sudyasi B.Farmonov qatnashdi.

Qabulda jinoyat, iqtisodiy va fuqarolik sudlariga oid turli masalalar yuzasidan murojaat qilib kelgan 15 nafarga yaqin fuqaroning dardi eshitildi. Murojaatlar asosan, jazoni yengillashtirish, yer, mol-mulk, aliment va boshqa masalalar bilan bog‘liq bo‘ldi. Har bir murojaatga alohida e’tibor qaratilib, nazoratga olindi.

Jumladan, sodir qilgan qilmishi uchun jinoiy javobgarlikka tortilib, jazo o‘tayotgan, tuman IIB probatsiya hisobida turuvchi 8 nafar mahkum qilmishidan pushaymonligi va tegishli xulosa chiqarganligi, qat’iy tuzalish yo‘liga o‘tganligini bayon qilib jazoning o‘talmay qolgan qismidan ozod qilishni so‘rab murojaat qildi.

Shu yerning o‘zida jinoyat ishlari bo‘yicha Urgut tuman sudi sudyalari tomonidan sayyor sud majlisi tashkil etildi va har bir holat alohida o‘rganilib, 6 nafar shaxs O‘zbekiston Respublikasi Jinoyat kodeksining 73-moddasiga asosan o‘talmay qolgan jazodan muddatidan ilgari shartli ravishda ozod etildi.