Avval xabar berganimizdek, bugun Xalq deputatlari Qashqadaryo viloyat kengashining navbatdagi sessiyasi bo‘lib o‘tdi.

Unda viloyat hokimi vazifasini bajaruvchi Murodjon Azimov 2021-yil ijtimoiy-iqtisodiy rivojlanish yakunlari va 2022-yil uchun belgilangan ustuvor yo‘nalishlar to‘g‘risida voha aholisiga murojaat qildi. Unda viloyat hokimi viloyatda aholining uy-joyga bo‘lgan ehtiyoji yuqori darajada saqlanib turganiga alohida e'tibor qaratdi.

Viloyatda aholining uy-joyga bo‘lgan ehtiyoji yuqori darajada saqlanib turibdi.

Shundan kelib chiqib, aholini arzon va sifatli uy-joylar bilan ta'minlash maqsadida, uy-joy bilan ta'minlash dasturi doirasida 2021 yilda 2 960 ta xonadonli 84 ta ko‘p qavatli uylarda qurilish ishlari boshlanib, hozirgacha 1 792 ta (51 %) xonadon foydalanishga topshirildi, qolgan 1 693 ta (49 %) xonadon esa yil yakuniga qadar foydalanishga topshiriladi.

“Obod qishloq” va “Obod mahalla” dasturlari doirasida 26 ta qishloq va 4 ta mahallada 1 099 ta ob'ektda 498 mlrd. so‘mlik qurilish-ta'mirlash ishlari bajarildi.

Jumladan, 2 047 ta yakka tartibdagi uy-joylar hamda 15 ta ko‘p xonadonli uy-joylar ta'mirlanib, atrofi obodonlashtirildi, 409,3 km ichimlik suvi, 216,5 km elektr tarmoqlari va 515,4 km yo‘llarda ta'mirlash ishlari bajarildi, 1 074 dona gaz balloni aholiga yetkazib berildi, 82 ta ijtimoiy soha hamda 170 ta bozor infratuzilmasi ob'ekti yangidan qurilib, ta'mirdan chiqarildi.

Shuningdek, 2022-yilda aholini uy-joy bilan ta'minlash maqsadida 2 ming 600 ta uy-joylar uchun 729 mlrd. so‘m ipoteka kreditlari hamda 2 mingta uylar uchun 83 mlrd 200 mln. so‘m subsidiyalar ajratiladi.

Mahalliy byudjet daromadlarini oshirib bajarilgan qismi hisobidan 60 ta uy-joy sotib olinadi va ular xotin-qizlar, nogironligi bo‘lgan shaxslar, yetim bolalar va ota-ona qaramog‘idan mahrum bo‘lgan bolalarga belgilangan tartibda beriladi.

Aholining uy-joyga bo‘lgan murojaatini o‘rganish, asosli taklif berish va talabga ko‘ra uy-joy bilan ta'minlanishida albatta, mazkur komissiyaning adolatli yondoshuvlariga, takliflariga tayanamiz.

2022-yildan boshlab, “Bog‘dod tajribasi” asosida uy-joylar, ishlab chiqarish, sanoat va ijtimoiy infrastruktura ob'ektlarini o‘z ichiga olgan Yangi O‘zbekiston massivlari barpo etiladi.

Birinchi bosqichda, Koson tumanining “Do‘stlik” va Yakkabog‘ tumanining “Ayg‘irko‘l” MFYlar hududidan ko‘p qavatli turar-joylar barpo etish uchun yer maydonlari tanlab olindi.

Koson tumani “Do‘stlik” mahallasida 30 ta va Yakkabog‘ tumani “Ayg‘irko‘l” mahallasida 25 ta ko‘p xonadonli uy-joylar, 5 ta ijtimoiy soha ob'ekti quriladi, deya ta'kidladi Murodjon Azimov.