Sudyalar oliy kengashi tomonidan Toshkent viloyatida o‘tkazilayotgan sayyor qabullar doirasida Zangiota tumanidagi xotin-qizlarga mo‘ljallangan jazoni ijro etish muassasasida ochiq muloqot va sayyor sud majlisi bo‘lib o‘tdi.

Qayd etildiki, to‘rt yil burun mazkur muassasada uch yarim mingdan ziyod mahkuma jazo muddatini o‘tayotgan bo‘lsa, bugunga kelib bu raqam yetti yuztaga yetmaydi.

Mahkumalar sonining keskin kamayishi davlat siyosatining ustuvor yo‘nalishiga aylangan insonparvarlik, kechirimlilik kabi azaliy qadriyatlarga borib taqaladi. Chunki, o‘tgan qisqa davrda insonparvarlik nuqtai nazaridan yuzlab mahkumalar muddatidan avval jazodan ozod qilindi.

Shuningdek, tayinlangan jazolar boshqasiga yoki shartliga almashtirilishi natijasida yana qanchasi oilalari bag‘riga qaytdi.  Bundan tashqari  inson qonuniy haq-huquqini so‘zsiz ta’minlash, huquqbuzarlik va jinoyatchilikning oldini olish,  jinoyat sodir etganlarni to‘g‘ri yo‘lga solish va ularning ijtimoiy reabilitatsiyasi borasida amalga oshirilgan ishlar natijasi ham  yuqorida qayd etilgan raqamda mujassamdir.

Ochiq muloqotda  mamlakat miqyosida olib borilayotgan ishlar qayd etilib, islohotlar mazmun-mohiyati tushuntirildi. Shuningdek, jazodan maqsad tarbiya ekani, kuni kelib ozodlikka chiqqanlar jamiyatga begona bo‘lmasligi, buning uchun xatodan to‘g‘ri xulosa chiqarib, to‘g‘ri yo‘lni tanlamoq lozim ekani ta’kidlandi.

– Ochiq muloqotga Toshkent viloyat sudlarida faoliyat ko‘rsatayotgan ayol sudyalarning taklif etilgani Kengash tashabbusi bo‘lib, tizimda korrupsiyaning barvaqt oldini olishga qaratilgan tadbirlardan biridir, – dedi Sudyalar oliy kengashi matbuot kotibi Tursunali Akbarov. – Zero, aksariyat jinoyatlar zamirida nafs omili yotadi. Birni ko‘rib fikr, birni qo‘rib shukur qilmoq uchun ham tadbirga  ayol sudyalar taklif etildi. Va ular tomonidan mahkumalarga kitob  sovg‘a qilindi.

Bo‘lib o‘tgan sayyor sud majlisida esa 15 nafar mahkumaning iltimosnomasi ko‘rib chiqilib, tayinlangan jazolarni yengilrog‘iga almashtirish haqida tegishli sud hujjatlari qabul qilindi.