Prezident Shavkat Mirziyoyev raisligida aholini sifatli uy-joy bilan ta’minlash, "Yangi O‘zbekiston" massivlarini barpo etish, “Yashil makon” umummilliy loyihasini puxta tayyorgarlik ko‘rgan holda boshlash masalasiga bag‘ishlangan videoselektor yig‘ilishi bo‘lib o‘tmoqda.

– Bugungi yig‘ilishda hududlarda bo‘lib o‘tgan saylovoldi uchrashuvlarda aholimiz tomonidan ko‘p ko‘tarilgan ikkita muhim masalani ko‘rib chiqamiz. Kun tartibidagi birinchi masala, bu – aholini sifatli uy-joy bilan ta’minlash hisoblanadi. “Inson qadri uchun” tamoyili asosida kelgusi besh yildagi barcha islohotlarimiz aholiga munosib turmush sharoiti yaratishga qaratilgan, – dedi Shavkat Mirziyoyev.

Ta’kidlanganidek, so‘nggi yillarda yurtimizda ipoteka dasturlari doirasida 140 mingdan ortiq uy-joylar barpo etilgan. Bu raqamni oldingi yillarga solishtirganda 10 martadan ham ko‘p demakdir.

Mamlakatimizda har yili 300 mingga yaqin nikohlar qayd etilmoqda, aholimiz kelgusi besh yilda 38 millionga yetishi kutilmoqda. Misol uchun, so‘nggi 30 yilda Namangan, Termiz va Xonobod shaharlari aholisi 2, Qarshi, Jizzax, Marg‘ilon, Nukus, Andijon, Zarafshon va Quvasoy aholisi 1,5 baravarga o‘sgan.

– Samarqand va Namangan shaharlari aholisi 1 milliondan oshadi, bu ham haqiqat. Bularni inobatga olib, aholining uy-joyga bo‘lgan talabini qondirish uchun kelgusi besh yilda yiliga 80 mingtadan xonadon qurishimiz zarur, – dedi davlatimiz rahbari.