Andijon shahridagi harbiy qismda O‘zbekiston Respublikasi harbiy prokurori o‘rinbosari, adliya podpolkovnigi Sarvar Muhitdinov sayyor qabul o‘tkazdi.

Prezidentimiz Shavkat Mirziyoyev tomonidan aholi murojaatlari bilan ishlash tizimini yangicha tashkil qilish, odamlarni murojaat qilishga majbur qilayotgan muammolarni joyida bartaraf etish bo‘yicha belgilab berilgan muhim vazifalardan kelib chiqib, O‘zbekiston Respublikasi Harbiy Prokuraturasi rejasiga ko‘ra tashkil etilgan sayyor qabulda Andijon viloyatidagi harbiy qismlarda xizmat vazifasini o‘tayotgan harbiy xizmatchilar hamda oila a’zolarining turli masalalar yuzasidan  murojaatlari eshitildi.

Harbiy prokuror o‘rinbosari S. Muhitdinov sayyor qabulga kelganlarga Prezidentimiz tomonidan ilgari surilgan “Xalq davlat organlariga emas, balki davlat organlari xalqimizga xizmat qilishi kerak” degan shior jamiyatimizda ustuvor ahamiyat kasb etishini ta’kidlab, murojaat qiluvchilarga ularni qiynayotgan masalalar bo‘yicha taklif, e’tiroz va mavjud muammolarni ochiq-oydin bayon etishlarini so‘radi.

Tadbir davomida harbiylar va ularning oila a’zolari tomonidan asosan, uy-joy olish, ishga joylashish, farzandlarini maktabgacha ta’lim tashkilotiga joylashtirish, shuningdek, xonadonlarida tabiiy gaz ta’minotini yaxshilash bilan bog‘liq murojaatlar bayon etildi.

– Hozirda oila a’zolarim bilan 2 xonali uyda yashayman, – deydi Chaqiriluvchilarni harbiy-texnik mutaxassisliklarga tayyorlash markazi xodimasi Odinaxon Aliyeva. – Yaqinda kelin oldim, uyimiz ikkita oilaga torlik qilmoqda. Shu bois, sayyor qabulda uyimizni kengaytirish yoki yangi uy olishda yordam ko‘rsatilishini so‘rab murojaat qildim. Harbiy prokuror o‘rinbosari imkon qadar yordam ko‘rsatilishini va’da qildi.

Qabulda kichik serjant To‘lqin Yo‘ldoshev oilaviy sharoitidan kelib chiqib, ish joyini uyiga yaqinroq joyga ko‘chirib berishlishini so‘rab murojaat qildi. Uning murojaati shu yerning o‘zida ijobiy hal etildi.

Sayyor qabul davomida qilingan 100 dan ortiq murojaatlarning aksariyati ijobiy hal etildi. Shuningdek, qo‘shimcha o‘rganish yoki bajarilishi ma’lum muddat talab etadigan masalalar ijrosini ta’minlash mudasaddi idoralar rahbarlariga topshirilib, bajarilishi nazoratga olindi.