Navoiy viloyati, Navbahor tumanidagi “Paxtakor” mahalla fuqarolar yig‘ini hududida eski ko‘rinishda bo‘lgan mahalla markazi qayta ta’mirlanishi natijasida zamonaviy mahalla guzari barpo etildi.

Yurtimizning boshqa hududlarida bo‘lgani kabi Navbahor tumanida ham aholi yashash sharoitlari va qishloqlarda infratuzilmani yanada yaxshilash maqsadida qator ijobiy ishlar amalga oshirildi. Jumladan, “Obod markaz” loyiha doirasida Beshrabod hamda Yangiqo‘rg‘on aholi punktlari markazlarida olib borilgan bunyodkorlik ishlari bunga yaqqol misoldir.

“Paxtakor” mahallasida bugungi kunda 833 ta xonadonda 3390 nafar aholi istiqomat qiladi.

Yangi mahalla guzarida mahalla fuqarolar yig‘ini xodimlari va profilaktika inspektori uchun alohida xonalar, shuningdek, 6 ta savdo do‘koni, 3 ta umumiy ovqatlanish shaxobchasi, 2 ta nonvoyxona, 2 ta kichik tikuvchilik sexi, 1 ta “Nuroniylar” choyxonasi, 1 ta bolalar o‘yingohi, 1 ta kattalar uchun sport maydoni, 1 ta favvora qurildi. Ushbu ob’ektlarning ishga tushishi natijasida mahallaning 52 nafar ishsiz fuqarosi ish bilan ta’minlandi.

Mahalla guzari hududida 4,1 milliard so‘mlik bunyodkorlik va obodonlashtirish ishlari olib borildi. Shundan 200 million so‘mi mahalliy byudjet mablag‘lari hisobidan, qolgan 3,9 milliard so‘m mablag‘ tadbirkorlar va homiylar mablag‘lari hisobidan sarflandi.