Kadastr agentligi Andijon viloyati boshqarmasiga O‘zbekiston Respublikasi Prezidentining Virtual va Xalq qabulxonalari orqali 2021 yilning o‘tgan davrida 525 ta murojaat kelib tushdi.

Murojaatlarning 63 tasi ijobiy hal etilib, 463 tasiga huquqiy tushuntirishlar berildi.

Joriy yil 23 iyul kuni Prezident Shavkat Mirziyoyev raisligida aholi murojaatlari bilan ishlash tizimini yangicha tashkil qilish chora-tadbirlari bo‘yicha o‘tkazilgan videselektor yig‘ilishda joylarda aholi murojaatlari bilan ishlashning yangicha tizimini shakllantirish, odamlarni murojaat qilishga majbur etayotgan muammolarni joyida bartaraf etish yuzasidan qator vazifalar belgilab berilgan edi.  

Ana shu vazifalardan kelib chiqib, qolaversa, kadastr sohasida fuqarolarni qiynayotgan masalalar bo‘yicha qilinayotgan murojaatlarning birortasi e’tibordan chetda qolayotgani yo‘q. Har bir murojaat o‘rganilib, imkon qadar qonuniy tarzda ijrosini ta’minlash choralari ko‘rilmoqda.  

Bo‘ston tuman, Guzar mahallasi, Abdulla Qahhor ko‘chasida yashovchi Abdumannob Mamayusupovning Bo‘ston shaharchasidagi bozor hududida savdo do‘koni bo‘lganligi, bozorni kengaytirish, infratuzilmasini yaxshilash maqsadida buzilishga tushganligi, buzilgan do‘konlar uchun boshqa joydan yer ajratib berilgan vaqtda u oilaviy sharoiti tufayli kela olmaganligini bildirib, endi o‘ziga ajratilgan yerni berilishini so‘rab murojjat qilgan.  

Ushbu murojaat bo‘yicha Ishchi guruh tuzilib, masala o‘rganib chiqildi.  

O‘rganish natijasida buzilgan do‘konlar qatorida xaqiqatdan ham A.Mamayusupovga tegishli do‘kon bo‘lgan. Bozor hududida joylashgan savdo do‘konlari davlat va jamoat ehtiyojlari uchun olib qo‘yilayotgan fuqarolarga Bo‘z tumani hokimining 2018 yil 28 iyul kungi 1057-q sonli qaroriga asosan, “O‘zbekiston” massividan yakka tartibda uy-joy qurish uchun yer uchastkasi ajratilgan.  

Masala to‘la o‘rganilib, kadastr xizmati mutaxassislari tomonidan fuqaro A.Mamayusupovga “O‘zbekiston” massividan yer maydoni ajratib berildi. Shu tariqa bir necha yildan buyon fuqaroni qiynab kelayotgan muammo ijobiy yechim topdi.  

Shuningdek, murojaat bo‘yicha Andijon tumanida faoliyat olib borayotgan fermer xo‘jaligi rahbarining muammosi ham kadastr xodimlari tomonidan hal etildi.

Fuqaro Sh.Usmonova o‘zi rahbarlik qilayotgan fermer xo‘jaligiga tegishli 2016 yildagi yer ijara shartnomasining asl nusxasini turli sabablarga ko‘ra ololmagani, mazkur hujjat Agentlikning Andijon tuman bo‘limida mavjudligi, uni olishga yordam berilishini so‘rab, murojaat qilgan. Agentlik mutaxassislari tomonidan so‘ralgan shartnomaning asl nusxasi topilib, murojaatchiga taqdim etildi.  

– Hech bir murojaat e’tiborimizdan chetda qolmaydi, – deydi Kadastr agentligi Andijon viloyati boshqarmasi rahbari Fayoziddin Berdiqulov. – Murojaatlarni imkon qadar qonuniy, ijobiy hal etishga harakat qilamiz. Asosiy maqsadimiz, kadastr sohasida fuqarolarimizni qiynayotgan muammolarni bartaraf etishga, odamlarni hayotidan rozi bo‘lib yashashlariga ko‘maklashishdir.

Kadastr agentligi Andijon viloyati boshqarmasi, uning tuman, shahar bo‘limlari tomonidan aholi murojaatlari bilan ishlash borasidagi ishlar izchil va tizimli olib borilmoqda.