Hududlar bo‘ylab Kadastr agentligi va Davlat kadastrlari palatasi tomonidan tuzilgan ishchi guruh sohadagi muammolarni o‘rganmoqda.

Kadastr sohasidagi tashkilotlarda murojaatlar bilan ishlashdagi muammolarning yechimi, ularning ijobiy hal etilishi borasidagi masalalar joyiga chiqib o‘rganilmoqda. Jumladan, bir qator sayyor qabullar, davra suhbatlari tashkil etilyapti.

Sirdaryo viloyati Kadastr agentligi boshqarmasi rahbari Sh.Primqulovning ma’lumot berishicha, hozirgi kunda Kadastr agentligining Sirdaryo viloyati boshqarmasi va Davlat kadastrlari palatasi tomonidan yuridik va jismoniy shaxslarning 190 ta murojaatlari «fuqarobay» ishlash tizimi orqali hal etilmoqda. Shuningdek, har bir murojaat fuqaroning xonadoniga borib o‘rganilmoqda.

 Eslatib o‘tamiz, yaqinda  prezident Shavkat Mirziyoyev «Aholi murojaatlari bilan ishlash tizimini yangicha tashkil qilish chora-tadbirlari» bo‘yicha o‘tkazilgan videoselektor yig‘ilishida vazirlik va idoralar o‘z yo‘nalishida eng ko‘p kelib tushayotgan murojaatlarni tahlil qilib, ularga aniq yechimlar topishi shart ekanligini alohida ta’kidlab o‘tgan edi.