Farg‘onada O‘zbekiston Respublikasi Bosh vazirining birinchi o‘rinbosari Ochilboy Ramatov ishtirokida “Obod qishloq” va “Obod mahalla” dasturining ijrosi, aholini uy-joy bilan ta’minlash, kuz-qish mavsumiga tayyorgarlik holati, investitsiya dasturi asosida amalga oshirilayotgan ishlar va kelgusi yil loyihalari ro‘yxatini shakllantirish masalalariga bag‘ishlangan videoselektor shaklida yig‘ilish bo‘lib o‘tdi.

Viloyatda joriy yilda“Obod qishloq” va “Obod mahalla”dasturlari doirasida 19 ta tuman va shaharlarda 2 tadan jami 38 ta qishloqlar va mahallalarda qurilish-ta’mirlash va obodonlashtirish ishlari amalga oshirilishi rejalashtirilgan. Buning uchun 261,9 milliard so‘m mablag‘ sarflanadi. Dasturga kiritilgan 4567 ta ob’ektlarning loyiha smeta hujjatlari to‘liq tayyorlangan. 296 ta ob’ektlarda 117,1 kilometr yo‘llar asfaltlanib, 31,1 kilometr yo‘llarni shag‘allashtirish ishlari to‘liq yakuniga yetkazilgan. bugungi kunda 36 ta qishloq va mahallalarga ichimlik suv tarmog‘i, 43,99 kilometr elektr tarmog‘i tortildi, 35 dona transformator, 2 ming 541 dona temir beton tayanchlari o‘rnatildi.

Ijtimoiy ob’ektlarda qurilish ishlari sifatli bajarilyapti. Hududlarda keng ko‘lamli obodonlashtirish ishlari amalga oshirilmoqda, aholini ish bilan ta’minlash, boshqa muammolarini hal etishga e’tibor qaratilmoqda.

Farg‘ona viloyatida 2021 yil Investitsiya dasturini amalga oshirish bo‘yicha 764,1 milliard so‘m mablag‘ doirasida 137 ta ijtimoiy va infratuzilma ob’ektlarida pudrat tashkilotlari tomonidan qurilish-ta’mirlash ishlari olib borilmoqda. Shuningdek, aholini ipoteka kreditlari asosida uy-joy bilan ta’minlash, 2021-2022 yillar kuz-qish mavsumiga tayyorgarlik ko‘rish bo‘yicha chora-tadbirlar ishlab chiqilib, ijrosi ta’minlanmoqda.

Kun tartibidagi har bir masala tegishli mas’ullar ishtirokida tanqidiy-tahliliy muhokama qilindi. Ushbu yo‘nalishlarda qilinishi zarur bo‘lgan topshiriq, vazifalarni belgilangan muddatlarda sifatli qilib bajarilishiga kelishib olindi.

Yig‘ilishda Bosh prokuror o‘rinbosari Akmalxo‘ja Mavlonov ishtirok etdi.