Andijon viloyati Mahalla va oilani qo‘llab-quvvatlash boshqarmasi, Xotin-qizlar jamoatchilik kengashi tashabbusi bilan «Mehrimizdan bir tomchi» deb nomlangan aksiya o‘tkazildi.

Aksiya doirasida aholidan ixtiyoriy ravishda viloyatning tuman va shaharlarida istiqomat qiluvchi ehtiyojmand, jismoniy imkoniyati cheklangan, shuningdek, boquvchisini yo‘qotgan oilalarga taqdim etish uchun ayollar, bolalar kiyim-kechaklari, idish-tovoqlar yig‘ildi.

– Mehr-oqibat, muhtojlarga ko‘maklashish maqsadida uyushtirilgan xayrli tashabbusda viloyatimizning faol ayollari hamda otinoyilar faollik ko‘rsatdi, – deydi viloyat bosh otinoyisi Shoiraxon Qosimova. – Aksiya davomida yig‘ilgan kiyim-kechak va jihozlar ehtiyojmand oilalarga taqdim etilib, oz bo‘lsada, ularning og‘irini yengil qilishga, turmushlarini chiroyli bo‘lishiga ko‘maklashilmoqda.  

Xayrli tashabbus mehr-oqibat, muhtojlarga saxovat ko‘rsatishdek xalqimizga xos ezgu ishlarning yorqin namunasidir.