2017-2021 yillarda O'zbekiston Respublikasini rivojlantirishning beshta ustuvor yo'nalishi bo'yicha harakatlar strategiyasi
Qoraqalpog‘istondagi ommaviy qabullarda 144 masala joyida hal etildi

Orolbo‘yida sud-huquq masalalari bo‘yicha tashkil qilingan navbatdagi ommaviy qabullarda 970 nafardan ziyod murojaatchining mingta masalasi ko‘rib chiqildi. Ularning 144 tasi joyida hal etildi, 342 ta murojaat bo‘yicha huquqiy maslahat va tushuntirish berildi, qo‘shimcha o‘rganish talab etiladigan 514 ta masala nazoratga olindi.

Qonliko‘llik Shiyrinxon Taumuratova 2014 yili Qo‘ng‘irot tumanidagi bir kollejda direktor o‘rinbosari bo‘lib ishlardi. Shu kollej rahbari bir choyxonadan 148 ming so‘m qarz bo‘lib qoladi-yu, bu pulni o‘sha kunlarda ishdan bo‘shatilayotgan psixologga to‘lashni buyuradi. Psixolog ayol ham ishda qolish uchun dastlab 50 ming so‘m olib kelganda, direktor pulni o‘zi olishdan qo‘rqib uni o‘rinbosarining oldiga yuboradi. Shiyrinxan Taumuratovaning bor aybi shu 50 ming so‘m nima uchun ekanini so‘rab-surishtirmay olib qolgani va direktorga eltib berganida bo‘ladi. Ertasi kuni psixolog yana 100 ming so‘m berayotgan joyda direktor qo‘lga olinadi, tabiiyki,oldingi 50 ming so‘m poraning vositachisi sifatida Shiyrinxon ham jinoyatchilar qatoriga qo‘shilib qoladi. 2015 yil 13 fevraldagi sud hukmi bilan Shiyrinxon Taumuratova 2 yil mansabdorlik lavozimlarida ishlash huquqidan mahrum qilinib, unga 2 yillik shartli sinov jazosi tayinlanadi.

Ommaviy qabullarda Shiyrinxon Taumuratova Oliy sud mas’ullaridan qariyb 7 yil oldingi sud hukmini qayta ko‘rib, qonuniy-adolatli hal qilib berishlarini so‘radi. Qoraqalpog‘iston Respublikasi sudining jinoyat ishlari bo‘yicha sudlov hay’ati bu shikoyatni jinoyat ishi materiallari bilan birga ko‘rib chiqib, Qo‘ng‘irot tuman sudining 2015 yil 13 fevraldagi ayblov hukmini bekor qildi. Harakatlarida jinoyat alomatlari bo‘lmaganligi sababli uni aybsiz deb topib, oqladi.

Prezident Xalq qabulxonalari uch kun davomida Ellikqal’a, Chimboy, Nukus, Qonliko‘l, Shumanay tumanlarida tashkil qilgan ochiq-jonli muloqotlarda Shiyrinxon singari muqaddam asossiz ravishda sudlangan jami 4 insonning ishi sudda qayta ko‘rilib, ularning barchasi oqlandi. Yana ko‘plab insonlarning mushkuli oson bo‘ldi, qonun ustuvorligi, odil sudlov yana bir bor amalda ta’minlandi, adolat, insonparvarlik tamoyillari qaror topdi.

Ommaviy qabullarda Orolbo‘yining barcha hududidagi murojaatchilar qamrab olindi. Har bir ariza va shikoyat hududlardagi mas’ul rahbarlar va murojaatchilar ishtirokida sinchiklab ko‘rib chiqildi.  

Bu jarayonda Oliy sud mas’ullari ko‘rib chiqqan 615 ta murojaatning 118 tasi joyida hal qilib berildi. Xususan, jinoyat ishlari bo‘yicha Beruniy, To‘rtko‘l, Ellikqal’a, Kegayli, Qonliko‘l, Qo‘ng‘irot, Xo‘jayli, Taxiatosh, Shumanay tumanlari va Nukus shahar sudi tomonidan 36 nafar shaxs jazoni o‘tashdan muddatidan oldin ozod qilindi. Yana 11 nafar shaxsga nisbatan tayinlangan ozodlikdan mahrum qilish va ozodlikni cheklash jazolari yengilrog‘iga almashtirildi.Sultonbek Sultonov uch yil oldin o‘ylamay bosgan qadami tufayli 7 yil 6 oyga qamalgan edi. Umrining 3 yil-u 10 oyini temir panjara ortida o‘tkazgan u o‘tgan davrda aybini tushundi, qilmishiga chin dildan pushaymon bo‘ldi. Oliy sud mas’ullari qabullar davomida uning ham belgilangan jazoni yengilrog‘iga almashtirish bo‘yicha so‘ralgan arizasini ko‘rib chiqdi. Ariza asosida sayyor sud o‘tkazilib, unga nisbatan yengilroq jazo tayinlanib, shu kunning o‘zida qamoqdan chiqarildi.  

Shuningdek, qabullarda 2 nafar shaxs ma’muriy javobgarlikdan ozod qilindi. Fuqarolik ishlari bo‘yicha sudlar 91 nafar shaxsning aliment undirish, 24 nafar shaxsning yuridik ahamiyatga ega faktlarni belgilash bo‘yicha arizasini qanoatlantirdi, 113 ta da’vo arizasi ish yurituviga olindi. Ajrashish yoqasiga kelib qolgan 34 ta oila yarashtirildi.

Qabullarda 104 ta murojaat bo‘yicha arizalar Oliy sud tomonidan kassatsiya tartibida hal qilish uchun qabul qilinib, tegishli sudlov hay’atiga ko‘rib chiqish uchun o‘tkazildi.

E’tiborlisi, muloqotlar davomida aholi nafaqat ariza yo shikoyat, balki takliflar bilan ham murojaat qildi. Taxiatosh tumanidagi xususiy uy-joy mulkdorlari shirkatlaridan birining hisobchisi Olloyor Yesimbetov Oliy sud mas’ullari oldiga tumanda fuqarolik ishlari bo‘yicha sud tashkil etish masalasini qo‘ydi. Bu murojaat o‘rganilishi va hal qilinishini Oliy sud mas’ullari o‘z nazoratiga oldi.

Bosh prokuratura mas’ullari kelib tushgan 214 ta masalaning har birini murojaatchi va Qoraqalpog‘iston prokuraturasi rahbariyati bilan yuzma-yuz muhokama qildi. Ular asosan tergov-surishtiruv, sud qarorlarini qayta ko‘rib chiqish, sud qarorlari ijrosi, ish bilan ta’minlash, kredit ajratish, tadbirkorlik va boshqa masalalardagi ariza-yu shikoyatlardan iborat. Bu murojaatlarning asosiy qismi qo‘shimcha o‘rganishni talab qilgani bois nazoratga olingan bo‘lsa, ayrim masalalar joyida hal qilindi. Tadbirkorlik bilan shug‘ullanishni niyat qilgan qonliko‘llik Zarafshan Turjanovaning 150 million so‘m kredit olish bo‘yicha murojaatini banklar anchadan beri cho‘zib kelmoqda. Ayolning Bosh prokuratura mas’ullariga murojaatidan so‘ng unga imtiyozli kredit ajratish masalasi joyida yechim topdi. Shu singari qo‘ng‘irotlik Gulzira Atabayeva va Irisgul Jakiyevaga qo‘shimcha daromad topishi uchun zamonaviy tikuv mashinalari olib berildi.

Yana bir qonliko‘llik Abadan Saparovaning sog‘lig‘ida muammolar bor, oilaviy sharoiti og‘ir. Shu bois Berdaq nomidagi Qoraqalpoq davlat universiteti kimyo fakultetida o‘qiyotgan farzandining shartnoma pulini to‘lay olmayapti. Onaning shu masalada amaliy yordam so‘rab qilgan murojaati ham e’tiborsiz qolmadi. Qonliko‘l tumani hokimligi bu talabaning shartnoma pulini to‘lab beradigan bo‘ldi. Xuddi shunday amaliy yordam so‘rab qilingan murojaatdan so‘ng Xo‘jayli tumani hokimligi Gulistan Kalilayevaga jarrohlik amaliyoti orqali ko‘zini davolatish uchun ketadigan sarf-xarajatni ichki imkoniyatlar hisobidan qoplab beradigan bo‘ldi.

Ichki ishlar vazirligi mutasaddilari ko‘rib chiqqan 60 ta masalaning aksariyati ichki ishlar organlariga ishga qayta tiklash, surishtiruv va tergov, ichki ishlar xodimlarining xatti-harakatlaridan norozilik kabi masalalar tashkil qilgani uchun har bir murojaat bo‘yicha aniq muddat va mas’ullar tayinlanib, nazoratga olindi. Soha xodimlari ustidan kelib tushgan har bir shikoyat bo‘yicha xizmat tekshiruvi tayinlandi. Murojaatlar asosida bir qator shaxslarning fuqarolik pasporti olish bilan bog‘liq masalalari hal qilib berildi. Chimboylik Elbrus Aytbayevning ham ikki yillik muammosiga shu yerda yechim topilib, sud qaroriga asosan olib qo‘yilgan haydovchilik guvohnomasi qaytarib berildi. shumanaylik Paruaz Mamutova esa Ichki ishlar vazirligi ma’sullariga o‘tgan galgi ommaviy qabulda qilgan murojaatlari ijobiy hal etilgani uchun minnatdorlik bildirdi.

26.05.2021

Hal etilgan murojaatlar

Murojaat tasnifiYuborish usuliKelib tushgan sanaKo'rib chiqilgan sanaHudud
Иш ҳақи ва унга тенглаштирилган тўловларни ундиришIshonch telefoni5 Iyun 202117 Iyun 2021Andijon viloyati

Foydali resurslar