Buxoro viloyatining eng olis hududlarida aholiga davlat xizmatlarini ko‘rsatish maqsadida jami 12 ta shoxobcha va filiallar tashkil qilindi. Bu aholi fikri, davlat xizmatlariga bo‘lgan ehtiyojni inobatga olgan holda amalga oshirildi. Shu bois joriy yilda filiallar sonini 20 taga yetkazish maqsad qilingan.

– Davlat xizmatlari agentligi viloyat boshqarmasi tomonidan bugungi kunda viloyatdagi 544 ta mahalla fuqarolar yig‘inining 290 tasida tushuntirish-targ‘ibot tadbirlari amalga oshirildi, – deydi Davlat xizmatlari agentligi viloyat boshqarmasi axborot xizmati rahbari Farrux To‘raqulov. – Unda 13 ming nafardan ortiq fuqaro qamrab olindi. Shuningdek, viloyatdagi 536 ta ta’lim muassasasining 386 tasida targ‘ibot tadbiri o‘tkazilib, bunda 15 ming nafardan ortiq o‘qituvchi va o‘quvchiga elektron davlat xizmatlaridan foydalanish tartibi o‘rgatildi. Eng muhimi, olis hudud aholisi sarson bo‘lmasligi kerak.

“Fuqarolar emas, hujjatlar harakatlanadi” tamoyili asosida mehnat qilgan Davlat xizmatlari agentligi bugungi kunga qadar jismoniy va yuridik shaxslarga tezkor, qulay va shaffof davlat xizmatlarini ko‘rsatib, xalq ko‘nglidan joy olgan tashkilotlardan biri bo‘lishga ulgurdi. Birgina agentlikning viloyat boshqarmasi tomonidan jismoniy va yuridik shaxslardan kelib tushgan murojaatlarning Qonunda belgilangan tartibda o‘z vaqtida har tomonlama va sifatli ko‘rib chiqilishi fuqarolarning tizimga bo‘lgan ishonchini yanada oshirishga xizmat qilmoqda.

2020 yilda boshqarmaga jami 400 dan ortiq murojaat kelib tushgan. Shundan 200 ga yaqin murojaat qanoatlantirilgan, 180 dan ortiq murojaatga huquqiy tushuntirish berilgan.  

Davlat xizmatlari agentligining asosiy maqsadi ham aholiga turli to‘siqlarsiz va ortiqcha hujjatlarsiz davlat xizmatlari ko‘rsatishdan iborat. Davlat rahbarining ta’biri bilan aytganda “Xalq davlat idoralariga emas, davlat idoralari xalqqa xizmat qilishi kerak”.