Farg‘ona viloyati Bag‘dod tumanidagi Amirobod va Istiqlol mahalla fuqarolar yig‘inlarida “Obod qishloq” dasturi asosida amalga oshirilayotgan keng ko‘lamli bunyodkorlik va obodonlashtirish ishlari nihoyasiga etkazilmoqda.

Keng va ravon ko‘chalar, zamonaviy xizmat ko‘rsatish majmualari kabi o‘zgarishlardan aholi behad mamnun.

– Mahallamizda 3 mingdan ortiq aholi istiqomat qiladi, – deydi “Amirobod” mahalla fuqarolar yig‘ini raisi Shamsiddin Turdaliev. –“Obod qishloq” dasturi asosida amalga oshirilayotgan ishlar natijasida hududimizga barcha havas bilan qaramoqda. Mahallani joriy yilda ijtimoiy-iqtisodiy rivojlantirish bo‘yicha "Yo‘l xaritasi" ishlab chiqildi. Asosiy maqsadimiz – aholi turmush darajasini yuksaltirish, yangi ish o‘rinlari yaratish, ayniqsa, yoshlarni ish bilan ta’minlash. Shuningdek, odamlarda o‘z qishlog‘i, mahallasi taqdiriga mas’uliyat hissini kuchaytirish, xalqimizdagi bunyodkorlik, tadbirkorlik, hamjihatlik fazilatlarini qo‘llab-quvvatlashdir. 

Dastur doirasida mahalladagi 336 xonadonda ta’mirlash ishlari amalga oshirildi. 3 kilometr ichimlik suvi, 1,2 kilometr uzunlikda elektr-energiyasi tarmog‘i tortildi, 8 transformator mukammal ta’mirlandi.

– Mahallamizda bunday ishlarni olib borilishini xayolimizga ham keltirmagan edik, – deydi Xursanali Sherg‘oziev. – O‘tgan yil kuz-qishda loy kechib maktabga qatnagan o‘quvchilar endi keng va ravon, asfalьtlangan ko‘chalardan yurib, o‘qishga borib kelmoqda. Kechalari ko‘chalarimiz charog‘on.

Darhaqiqat, shu kunga qadar yo‘lsozlarning mehnati bilan 6,5 kilometr uzunlikdagi yo‘llar zamonaviy ko‘rinish oldi. Asosiy yo‘l yoqasiga 75 ko‘cha chiroqlari o‘rnatildi. 9-umumiy o‘rta ta’lim maktabi, “Amirobod” qishloq oilaviy poliklinikasi, 41-davlat maktabgacha ta’lim muassasasida qurilish-ta’mirlash ishlari bajarildi. Shuningdek, savdo va xizmat ko‘rsatish shoxobchalari, ijtimoiy dorixona, supermarket, hammom bunyod etilmoqda. Tadbirkorlik sub’ektlari tomonidan 100 dan ziyod aholini ish bilan ta’minlashga erishildi. Uyma-uy yurib, aholidan olingan taklif va so‘rovlar asosida hududdagi zax suvlari sathini pasaytirish uchun kollektorlarda tozalash ishlari olib borildi.

Kim bilan suhbatda bo‘lmang, bu erdagi bunyodkorlik ishlaridan ruhlanganini, ertangi kunga katta ishonch bilan qarayotganini guvohi bo‘lasiz. “Bir piyola choy ichib, mehmonimiz bo‘ling” deya sizga lutf qiladi. Bularning barchasi obodlik va farovonlik belgisi emasmi? 

Ma’sudjon Sulaymonov, O‘zA