Toshkent davlat iqtisodiyot universitetida O‘zbekiston Respublikasi Innovatsion rivojlanish vazirligi, Yoshlar ishlari agentligi, Toshkent shahar hokimligi, Davlat soliq qo‘mitasi hamda “Mikrokreditbank” rahbarlari yoshlar bilan uchrashdi.

Uchrashuvda yoshlar asosan ijara, ta’lim, tadbirkorlik, uy-joy kreditlari, soliq va bandlik masalalari bo‘yicha murojaat qildi. Aksariyat murojaatlar joyida ijobiy hal etildi.

Qurilish, madaniyat, ishlab chiqarish, xizmat ko‘rsatish va yer ajratish hamda katta mablag‘li kredit olish kabi masalalarga oid murojaatlar yuzasidan zarur ko‘rsatmalar berildi. Xususan, Toshkent shahar hokimi Jahongir Ortiqxo‘jayev tomonidan o‘quv kurslari uchun mablag‘ so‘ragan yoshlarning murojaati inobatga olindi.

– Ingliz tiliga qiziqqanim sababli ko‘p yillardan buyon o‘rganishga harakat qilib kelardim, – dedi Mirzo Ulug‘bek nomidagi Milliy universitet talabasi Roziyabonu Anvarova.

 – Kitob o‘qishga harakat qildim, lug‘at yod oldim, lekin baribir o‘quv kursida malaka oshirishim kerakligini his qildim. Ammo buning uchun, ayniqsa, talabaga yetarli mablag‘ kerak. bugungi tadbirda shu mavzuda yordam so‘rab murojaat qildim. Toshkent shahar hokimi savollarimga javob berdi va Olmazor tumanidagi o‘quv kurslaridan birida 6 oy davomida bepul ta’lim olishimni aytdi. Bundan juda xursandman.

Uchrashuvda Roziyabonu kabi ko‘plab yoshlarning murojaati ijobiy hal etildi.