Farg‘ona shahridagi “Tadbirkorlar uyi”da Farg‘ona viloyati hokimi Xayrullo Bozorovning navbatdagi tadbirkorlik qabuli bo‘lib o‘tdi.

Ertalabdan boshlangan qabul uzluksiz 10 soatdan ziyod davom etdi va 150 dan ziyod tadbirkorning murojaati ko‘rib chiqildi. Viloyatda tadbirkorlar va fuqarolarning davlat hokimiyati organlariga ishonchi tobora ortib borayotgani, so‘nggi oylarda viloyat hokimi qabuliga kelayotganlar sonining muttasil o‘sayotganida namoyon bo‘lmoqda. Shu bilan birga, shahar va tuman hokimlari o‘z hududlarida tadbirkorlar masalalari va murojaatlariga yanada jiddiy yondashishlari lozimligini ko‘rsatmoqda.

Qabulda ishtirok etgan tadbirkorlar viloyat rahbariga bank krediti va subsidiya olishga ko‘maklashish, ishlab chiqarish va qishloq xo‘jaligi uchun yer maydoni va bo‘sh turgan bino-inshootlar ajratib berish, ishlab chiqarish korxonalarida gaz va elektr ta’minotini yaxshilash, davlat-xususiy sheriklik asosidagi loyihalarni amalga oshirish, mahsulot realitsiyasiga yordamlashish, shuningdek soliq to‘lash bo‘yicha yengilliklar taqdim etish, kadastr va egalik huquqi bilan bog‘liq muammolarni hal etish va boshqa ko‘plab masalalarda murojaat qildilar. Shuningdek, mahalliy hokimiyatlar va idoralar tomonidan joylarda tadbirkorlar faoliyatlariga bo‘layotgan to‘siqlar bilan bog‘liq masalalar ko‘tarildi.

Qabulda davomida tadbirkorlik loyihalarini amalga oshirishda yordam so‘rab murojaat qilgan yoshlar ham ko‘p bo‘ldi. Oltiariqlik Ravshanbek Shokirov shulardan biri. U "Yangiqo‘rg‘on" mahalla fuqarolar yig‘inidagi bo‘sh turgan binoda trikotaj mahsulotlari ishlab chiqarishni tashkil etish niyatida. Shuningdek, mazkur binoni ta’mirlab, mahalla yig‘ini uchun ham joy berish va boshqa xizmat ko‘rsatish shoxobchalarini ochish, 40 ta ish o‘rni yaratish bo‘yicha taklif bildirdi. Uning loyihasi qo‘llab-quvvatlanadigan bo‘ldi.

Muammolarning aksariyati qabul chog‘ida hal etildi. O‘rganish talab etiladigan masalalar bo‘yicha viloyat hokimining vakillari tadbirkorlar bilan birga qabuldan to‘g‘ri joylarga chiqib ketdilar. Hal etilishi muddat talab etuvchi murojaatlar bo‘yicha viloyat hokimi tegishli mutasaddilarga ko‘rsatma va topshiriqlar berdi.